ایئر انڈیا کا طیارہ فنی خرابی کے باعث پاکستانی فضائی حدود میں داخل، 4 گھنٹے تاخیر سے امرتسر پہنچا
دہلی سے امرتسر جانے والی پرواز AI-479 راستہ بھٹک گئی، پاکستان کی وارننگ کے بعد واپس بھارتی فضائی حدود میں لوٹی
نئی دہلی، 24 جون: (اردودنیا.اِن/ایجنسیز) ایئر انڈیا کی پرواز AI-479 پیر کی رات دہلی سے امرتسر جاتے ہوئے فنی خرابی کا شکار ہوگئی، جس کے نتیجے میں طیارہ اپنے مقررہ راستے سے ہٹ کر مختصر وقت کے لیے پاکستانی فضائی حدود میں داخل ہوگیا۔ اطلاعات کے مطابق پائلٹ کو اس صورتحال کا علم اس وقت ہوا جب پاکستان کی فضائی نگرانی کرنے والے حکام نے وارننگ جاری کی، جس کے بعد طیارے نے فوری طور پر رخ تبدیل کیا اور واپس بھارتی فضائی حدود میں آگیا۔
رپورٹس کے مطابق یہ واقعہ ایسے وقت پیش آیا جب پاکستان کی فضائی حدود بھارتی رجسٹریشن رکھنے والے تمام طیاروں کے لیے بند ہے۔ پاکستان ایئرپورٹس اتھارٹی کی جانب سے جاری نوٹم (NOTAM) کے تحت یہ پابندی اپریل 2025 سے نافذ ہے اور اس میں مسلسل توسیع کی جا رہی ہے۔ حال ہی میں جاری نوٹم کے مطابق پابندی 24 جولائی 2026 تک برقرار رہے گی۔
ذرائع کے مطابق پرواز AI-479 پیر کی رات 9:18 بجے دہلی سے روانہ ہوئی تھی اور اسے رات 10:30 بجے امرتسر پہنچنا تھا، تاہم دورانِ پرواز پیش آنے والی تکنیکی خرابی کے باعث نیویگیشن نظام متاثر ہوا اور طیارہ غلط سمت میں چلا گیا۔ امرتسر ایئرپورٹ کے ذرائع کا کہنا ہے کہ طیارہ پاکستانی حدود میں تقریباً ڈیڑھ میل تک داخل ہوا تھا، جس کے بعد اسے فوری طور پر واپس موڑ لیا گیا۔
بھارتی فضائی حدود میں واپسی کے بعد بھی پرواز کو فوری لینڈنگ کی اجازت نہیں مل سکی کیونکہ اس وقت امرتسر ایئرپورٹ پر فضائی ٹریفک کا دباؤ زیادہ تھا۔ طیارہ کچھ دیر تک امرتسر کے اطراف فضاء میں چکر لگاتا رہا، بعد ازاں ایئر ٹریفک کنٹرول کی ہدایت پر اسے واپس دہلی بھیج دیا گیا، جہاں وہ بحفاظت اتر گیا۔
تقریباً دو گھنٹے بعد پرواز کو دوبارہ امرتسر جانے کی اجازت دی گئی اور طیارہ پیر اور منگل کی درمیانی شب تقریباً 2:20 بجے امرتسر ایئرپورٹ پر بحفاظت لینڈ کر گیا۔ اس پورے عمل کے دوران مسافروں کو تقریباً چار گھنٹے کی تاخیر کا سامنا کرنا پڑا۔
ہوائی اڈے کے حکام کے مطابق رن وے کی دستیابی یا فضائی ٹریفک کی وجہ سے طیاروں کا کچھ وقت تک فضا میں انتظار کرنا معمول کی بات ہے، تاہم اس معاملے میں بنیادی وجہ فنی خرابی اور نیویگیشن نظام میں پیدا ہونے والا خلل بتایا جا رہا ہے۔ حکام نے واقعے کی تحقیقات شروع کر دی ہیں جبکہ خرابی کی اصل وجہ جاننے کی کوشش کی جا رہی ہے۔
