امیٹھی میں گائے ذبیحہ معاملہ پر پولیس انکاؤنٹر۔ملزم زخمی، پانچ ساتھی گرفتار

نئی دہلی 21 فروری:(اردودنیا.اِن/ایجنسیز) اترپردیش کے ضلع امیٹھی میں گائے ذبیحہ کے ایک معاملے میں مطلوب ملزم کے ساتھ پولیس کی مڈبھیڑ پیش آئی، جس کے دوران ملزم کے ٹانگ میں گولی لگ گئی۔ پولیس نے کارروائی کرتے ہوئے اس کے پانچ دیگر ساتھیوں کو بھی گرفتار کر لیا ہے۔

پولیس کے مطابق یہ واقعہ ضلع امیٹھی کے انہونا تھانہ علاقہ کے گندنالہ سیمروتا روڈ پر پیش آیا۔ اطلاع ملی تھی کہ کرنگاؤں میں پیش آئے گائے ذبیحہ کیس کا مطلوب ملزم جنید احمد فرار ہونے کی کوشش کر رہا ہے۔ اطلاع ملتے ہی پولیس نے علاقے کی ناکہ بندی کر کے ملزم کو گھیر لیا۔

محاصرے کے دوران قریبی تھانوں سے بھی پولیس فورس کو طلب کیا گیا۔ خود کو گھرا ہوا دیکھ کر ملزم نے پولیس ٹیم پر فائرنگ شروع کر دی۔ پولیس کی جوابی کارروائی میں جنید احمد کی ٹانگ میں گولی لگی، جس کے بعد اسے زخمی حالت میں گرفتار کر کے فوری طور پر اسپتال منتقل کیا گیا۔

پولیس نے جائے وقوعہ سے اسلحہ اور دیگر سامان برآمد کیا ہے۔ ملزم کے قبضے سے ایک پستول، دو زندہ کارتوس، ایک موٹر سائیکل اور گائے ذبح کرنے کا سامان ضبط کیا گیا ہے۔ فرانزک ٹیم نے بھی موقع پر پہنچ کر ضروری شواہد اکٹھے کیے۔

ایڈیشنل سپرنٹنڈنٹ آف پولیس گیانیندر کمار سنگھ نے بتایا کہ ملزم کرنگاؤں کے گائے ذبیحہ معاملے میں مطلوب تھا اور اس کے خلاف قانونی کارروائی جاری ہے۔ پولیس کا کہنا ہے کہ گرفتار کیے گئے پانچوں افراد سے بھی پوچھ گچھ کی جا رہی ہے اور مزید تفتیش کے بعد اہم انکشافات متوقع ہیں۔