نئی دہلی ، 3اکتوبر:(اردودنیا.اِن/ایجنسیاں)مرکزی وزیر داخلہ امت شاہ کا جموں و کشمیر کا تین روزہ دورہ آج سے شروع ہو رہا ہے۔ ان کے دورے کو لے کر جموں سے وادی تک تحریک تیز ہو گئی ہے۔ اس دورے کے دوران سبھی کی نظریں منگل کو راجوری میں ہونے والے جلسہ عام پر لگی ہوئی ہیں۔ ذرائع کی مانیں تو امیت شاہ اس ملاقات میں جموں و کشمیر کی پہاڑی برادری کے ایک بڑے طبقے کو بڑا تحفہ دے سکتے ہیں۔ پہاڑی برادری کو ایس ٹی کا درجہ دینے کے دیرینہ مطالبہ پربڑا اعلان کر سکتے ہیں۔ اگر ایسا ہوتا ہے تو اس فیصلے کو بی جے پی کے لیے ایک ماسٹر اسٹروک سمجھا جا رہا ہے جس سے آنے والے اسمبلی انتخابات میں بی جے پی کو بڑا فائدہ مل سکتا ہے۔بتادیں کہ جموں و کشمیر سے آرٹیکل 370 کی منسوخی کے بعد، وزیر داخلہ امت شاہ جموں و کشمیر کے اپنے دوسرے دورے پر آج شام 7 بجے جموں پہنچ رہے ہیں۔
جیسے ہی وہ جموں پہنچیں گے، شاہ چار مختلف وفود سے ملاقات کریں گے۔ گجر، بکروال پہاڑی برادری کے لوگوں کے ساتھ ملاقات کرکے تبادلہ خیال کریں گے، جب کہ راجپوت برادری کی ایک پارٹی راجہ ہری سنگھ کی سالگرہ پر چھٹی کے دن ان کا شکریہ ادا کرنے پہنچے گی۔ یہ تمام میٹنگیں راج بھون میں ہوں گی۔تاہم سب کی نظریں کل راجوری میں ہونے والی میٹنگ پر لگی ہوئی ہیں۔ مانا جا رہا ہے کہ وزیر داخلہ امت شاہ راجوری کے اجلاس سے پہاڑی برادری کو ایس ٹی کا درجہ دینے کا اعلان کر سکتے ہیں، جسے بھارتیہ جنتا پارٹی کے لیے گیم چینجر سمجھا جا رہا ہے۔
جموں و کشمیر کے تقریباً 5 اضلاع میں پہاڑی برادری کا اثر و رسوخ ہے، جب کہ تقریباً 10 ایسی اسمبلی سیٹیں ہیں جو براہ راست متاثر ہیں۔ذرائع کی مانیں تو اسمبلی انتخابات میں اس کا فائدہ بی جے پی کو ملے گا، لیکن ایس ٹی اور درجہ رکھنے والی کئی ذاتیں، خاص کر گوجر، بکروال اس کے خلاف کھڑے ہو سکتے ہیں۔ یہی وجہ ہے کہ وزیر داخلہ امت شاہ ان برادریوں کے سرکردہ لوگوں سے الگ الگ بات کرنا چاہتے ہیں۔بتایا جا رہا ہے کہ پہاڑی بولنے والوں کی 4 لاکھ سے زیادہ آبادی 1965 سے یہ مطالبہ کر رہی ہے کہ انہیں ایس ٹی کا درجہ دیا جائے۔
