امروہہ کی پٹاخہ فیکٹری میں زوردار دھماکہ، 4 خواتین مزدور ہلاک، 6 شدید زخمی

امروہہ، 16 جون (اردو دنیا نیوز/ایجنسیز):اتر پردیش کے امروہہ ضلع کے رجب پور تھانہ علاقے کے گاؤں اتراسی میں واقع پٹاخہ فیکٹری میں پیر کے روز زوردار دھماکہ ہوا، جس میں چار خواتین مزدور موقع پر ہی جاں بحق ہو گئیں جبکہ چھ دیگر مزدور شدید زخمی ہو گئے۔

مقامی ذرائع کے مطابق دھماکہ اس وقت ہوا جب خواتین مزدور فیکٹری میں معمول کا کام کر رہی تھیں۔ اچانک زوردار آواز کے ساتھ پورے علاقے میں دھویں کا گہرا بادل چھا گیا، اور فیکٹری کا بڑا حصہ تباہ ہو گیا۔

حادثے کی خبر ملتے ہی پورے علاقے میں افراتفری مچ گئی۔ موقع پر ضلع مجسٹریٹ (DM)، سپرنٹنڈنٹ آف پولیس (SP) اور فائر بریگیڈ سمیت پولیس کی بھاری نفری پہنچ گئی۔ راحت و بچاؤ کا کام تیزی سے جاری ہے اور زخمیوں کو نزدیکی اسپتال میں داخل کرا دیا گیا ہے۔

یہ حادثہ ماضی میں پیش آئے کئی خوفناک پٹاخہ دھماکوں کی یاد دلا گیا ہے۔دیوبند، 26 اپریل یوپی کے سہارنپور ضلع کے دیوبند میں بھی پٹاخہ فیکٹری میں اسی قسم کا زوردار دھماکہ ہوا تھا، جس میں تین مزدور ہلاک اور کئی زخمی ہو گئے تھے۔ واقعہ صبح 7 بجے پیش آیا اور پوری فیکٹری کی عمارت زمین بوس ہو گئی۔ مزدوروں کے جسم کے اعضا 200 میٹر دور تک بکھر گئے تھے۔

سرساوا، 2 مئی 2022 میں سہارنپور کے سرساوا علاقے میں بھی ایک غیر قانونی پٹاخہ فیکٹری میں دھماکہ ہوا تھا، جس میں فیکٹری مالک سمیت تین افراد جاں بحق ہو گئے تھے۔

بار بار پیش آنے والے ان حادثات سے ایک بار پھر یہ سوال اٹھنے لگا ہے کہ آخر پٹاخہ فیکٹریوں میں حفاظتی اقدامات کیوں نہیں اپنائے جاتے؟