چار بچے کار میں دم گھٹنے سے جاں بحق، آندھرا پردیش میں دلخراش واقعہ

وجئے نگرم :(اردودنیا.اِن/ایجنسیز) آندھرا پردیش کے ضلع وجئے نگرم کے علاقے دورا پُڈی میں اتوار کے روز ایک دل دہلا دینے والا واقعہ پیش آیا، جہاں چار کم عمر بچے ایک لاک شدہ کار میں دم گھٹنے سے جاں بحق ہو گئے۔

پولیس کے مطابق، تمام بچے 10 سال سے کم عمر کے تھے اور کھیلتے کھیلتے ایک پارک کی گئی کار میں جا بیٹھے۔ بدقسمتی سے کار کے دروازے اندر سے بند ہو گئے اور بچے اس میں پھنس گئے۔ جب وہ طویل وقت تک واپس نہ آئے تو والدین نے ان کی تلاش شروع کی۔ بعد ازاں بچوں کی لاشیں مقامی مہلا منڈلی آفس کے قریب کھڑی کار سے برآمد ہوئیں۔

ہلاک ہونے والے بچوں کے نام اُدے (8)، چارومتی (8)، چریشما (6)، اور مناسوی (6) بتائے گئے ہیں۔ چارومتی اور چریشما آپس میں بہنیں تھیں، جبکہ باقی دو ان کے دوست تھے۔ واقعے کے بعد پورا گاؤں سوگ میں ڈوب گیا۔

یہ تلگو ریاستوں میں ایک ماہ کے دوران دوسرا ایسا واقعہ ہے۔ گزشتہ ماہ تلنگانہ کے رنگا ریڈی ضلع میں بھی دو بچیاں کار میں دم گھٹنے سے جاں بحق ہوئی تھیں۔ دماراگڈہ گاؤں میں چار اور پانچ سال کی دو کزن بچیاں ایک شادی میں شرکت کے دوران کھیلتے ہوئے کار میں جا بیٹھیں۔ دروازے لاک ہو گئے اور وہ شدید گرمی میں دم گھٹنے سے چل بسیں۔