ممبئی، 27 اکتوبر :(اردودنیا.اِن/ایجنسیاں)کروز ڈرگ کیس کی تحقیقات کر رہے سمیر وانکھیڑے نے ایک بار پھر کہا ہے کہ ان پر لگائے گئے تمام الزامات بے بنیاد ہیں۔ مہاراشٹر کے وزیر نواب ملک اور کروز ڈرگ کیس کے گواہ پربھاکر سیل نے وانکھیڑے کے خلاف وصولی کے الزامات لگائے ہیں۔ تحقیقات کے لیے این سی بی نے دنیشور سنگھ کی قیادت میں پانچ رکنی ٹیم تشکیل دی ہے۔ اس سلسلے میں این سی بی کے شمالی زون کے ڈپٹی ڈائریکٹر جنرل دنیشور سنگھ ممبئی پہنچ گئے ہیں۔
وانکھیڑے آج ویجیلنس ٹیم کے سامنے پیش ہوئے۔ذرائع کے مطابق سمیر وانکھیڑے کا بیان این سی بی کی ویجیلنس ٹیم نے باندرہ سی آر پی ایف کیمپ میں ریکارڈ کیا۔ وانکھیڑے تقریباً چار گھنٹے تک یہاں رہے۔ ان سے خود این سی بی ویجیلنس چیف دنیشور سنگھ نے پوچھ گچھ کی۔ اس کے بعد دنیشور سنگھ نے کہا کہ پربھاکر سیل اور کے پی گوساوی کو نوٹس جاری کرنے کی درخواست کی گئی تھی، لیکن ہماری پوری کوشش کے باوجود انہیں نوٹس نہیں دیا گیا۔
انہوں نے کہاکہ میڈیا کے ذریعے درخواست ہے کہ کے پی گوساوی اور پربھاکر سیل تحقیقات میں شامل ہوں۔ کل یا پرسوں سی آر پی ایف میس، باندرہ میں آؤ اور جو کہنا چاہو کہو۔ آج اس ٹیم نے کچھ دستاویزات جمع کی ہیں۔ سمیر وانکھیڑے کا بیان ریکارڈ کر لیا گیا ہے۔ اس نے بہت سی چیزیں رکھی ہیں۔ آنے والے وقت میں ضرورت کے مطابق ان سے مزید شواہد یا دستاویزات لئے جائیں گے۔
