ملبورن، 27اکتوبر:(اردودنیا.اِن/ایجنسیاں) آسٹریلیا کی فٹ بال ٹیم نے ورلڈ کپ ٹورنامنٹ سے قبل قطر میں انسانی حقوق کی مبینہ خلاف ورزیوں کے خلاف آواز بلند کی ہے۔آسٹریلوی ٹیم نے قطر میں ہم جنس پرستوں کے حقوق کا خیال رکھنے کی بھی بات کہی۔آسٹریلیا کی قومی فٹ بال ٹیم نے عالمی کپ کے میزبان قطر میں انسانی حقوق کے ریکارڈ سے متعلق اپنی آواز بلند کی ہے۔ وہ ورلڈ کپ میں حصہ لینے والی ایسی پہلی ٹیم ہے، جس نے دوحہ پر اجتماعی طور پر تنقید کی ہو۔آسٹریلیا کی فٹبال ٹیم سوکروز کی جانب سے جمعرات کے روز ایک ویڈیو جاری کیا گیا، جس میں ٹیم کے تمام 16 کھلاڑی دکھائے گئے ہیں۔
یہ تمام کھلاڑی باری باری اپنی بات کہتے ہیں۔ مشرق وسطیٰ کے ملک قطر میں ہم جنس پرستی غیر قانونی ہے، تاہم اس ویڈیو میں ہم جنس پرستوں کے حقوق کے بارے میں بھی بات کی گئی ہے۔اس ویڈیو میں قطر میں ورلڈ کپ ٹورنامنٹ کے انعقاد کے لیے جن 16 لاکھ تارکین وطن مزدوروں نے تعمیری کام میں حصہ لیا، انہیں مبینہ طور پر پہنچنے والے نقصان کے بارے میں بھی بات کی گئی ہے۔ٹیم کے مڈفیلڈر جیکسن اروائن نے ویڈیو میں کہا کہ ہمیں معلوم ہوا ہے کہ قطر میں ورلڈ کپ کی میزبانی کے فیصلے کے نتیجے میں، ہمارے بہت سے کام کرنے والے ساتھیوں کو تکلیف اور نقصان پہنچا ہے۔دوسرے کھلاڑی ڈینس جنریو کا کہنا تھا کہ بطور کھلاڑی، ہم ایل جی بی ٹی کمیونٹی کے لوگوں کے حقوق کی مکمل حمایت کرتے ہیں، لیکن قطر میں لوگ اپنے منتخب کردہ شخص سے محبت کرنے کے لیے آزاد نہیں ہیں۔
اس کا کہنا ہے ہم حالیہ برسوں میں قطر میں کام کرنے والوں کے حقوق کو تسلیم کرنے اور ان کے تحفظ کے لیے ہونے والی اہم پیش رفت اور قانون سازی کی اصلاحات کو نہ صرف تسلیم کرتے ہیں، بلکہ ہم تمام اسٹیک ہولڈرز کو اصلاحات کے اس راستے کو جاری رکھنے کی بھی ترغیب دیتے ہیں۔
