ناگویا، 25 ستمبر (اردو دنیا نیوز/ایجنسیز) بھارتی ایتھلیٹ بارانیکا ایلنگووان نے ایشین گیمز 2026 میں خواتین کے پول والٹ مقابلے میں برونز میڈل جیت کر نئی تاریخ رقم کردی۔ وہ ایشین گیمز میں پول والٹ کے مقابلے میں بھارت کے لیے میڈل جیتنے والی پہلی ایتھلیٹ بن گئی ہیں۔
تمل ناڈو سے تعلق رکھنے والی 29 سالہ بارانیکا نے 4.15 میٹر کی بلندی کامیابی سے عبور کی۔ قازقستان کی پولینا ایوانووا نے بھی 4.15 میٹر کی بلندی عبور کی اور دونوں ایتھلیٹس کی کوششوں کا ریکارڈ یکساں رہا۔ دونوں نے 4.25 میٹر کی بلندی عبور کرنے کی کوشش کی، تاہم کامیاب نہ ہوسکیں، جس کے بعد دونوں کو مشترکہ طور پر تیسری پوزیشن دی گئی۔
بارانیکا کی یہ کامیابی بھارتی ایتھلیٹکس کے لیے اہم سنگ میل ہے، کیونکہ ایشین گیمز میں مردوں اور خواتین کے پول والٹ مقابلوں میں اس سے قبل بھارت کے نام کوئی میڈل نہیں تھا۔
بارانیکا کے برونز میڈل کے ساتھ ایشین گیمز میں بھارت کے مجموعی میڈلز کی تعداد 23 ہوگئی ہے۔ بھارت نے اب تک دو گولڈ، نو سلور اور 12 برونز میڈلز جیتے ہیں۔
اسی روز مردوں کی 10 ہزار میٹر دوڑ میں گل ویر نے شاندار کارکردگی کا مظاہرہ کرتے ہوئے 28:29.38 کا وقت درج کیا اور سلور میڈل اپنے نام کیا۔ خواتین کے شاٹ پٹ مقابلے میں منپریت کور نے 17.17 میٹر کی بہترین تھرو کے ساتھ برونز میڈل حاصل کیا۔
شوٹنگ میں کمال جیت اور سورچی اندر سنگھ نے 10 میٹر ایئر پسٹل مکسڈ ٹیم مقابلے میں گولڈ میڈل جیتا۔ مردوں کے 50 میٹر رائفل تھری پوزیشنز ٹیم مقابلے میں ایشوریہ پرتاپ سنگھ تومر، رودرانکش پاٹل اور نیرج کمار کی ٹیم نے سلور میڈل حاصل کیا۔
ٹیبل ٹینس کے مکسڈ ڈبلز مقابلے میں منوش شاہ اور دیا چتالے نے سیمی فائنل تک رسائی حاصل کرکے برونز میڈل یقینی بنایا۔ سیمی فائنل میں بھارتی جوڑی کو چین کے وانگ چوقن اور سن ینگ شا کے خلاف شکست کا سامنا کرنا پڑا۔
اسکواش کے مکسڈ ڈبلز میں جوشنا چنپا اور ویلاون سینتھل کمار کی بھارتی جوڑی سیمی فائنل میں پہنچ گئی، جس کے ساتھ بھارت کا ایک اور میڈل یقینی ہوگیا۔ ابھے سنگھ اور انہت سنگھ نے بھی اپنے اپنے سنگلز مقابلوں کے سیمی فائنل میں جگہ بنالی۔
کبڈی میں بھارتی مردوں اور خواتین کی ٹیموں نے سیمی فائنل میں بالترتیب تھائی لینڈ اور نیپال کو شکست دے کر فائنل میں جگہ بنالی۔ ہاکی میں بھارتی خواتین کی ٹیم نے پول بی کے میچ میں جاپان کو 3-1 سے شکست دی۔
دوسری جانب تیراکی کے مردوں کے 200 میٹر بیک اسٹروک فائنل میں رشبھ داس چھٹے نمبر پر رہے۔ ویٹ لفٹنگ کے خواتین کے 61 کلوگرام مقابلے میں سیرم نروپما دیوی ساتویں نمبر پر رہیں۔
باکسنگ میں پریتی کو راؤنڈ آف 16 کے مقابلے میں شمالی کوریا کی پینگ چول می کے ہاتھوں 0-5 سے شکست ہوئی، جس کے بعد ان کا ایشین گیمز کا سفر ختم ہوگیا۔
