نئی دہلی ، 5 اگست :(اردودنیا.اِن/ایجنسیاں)مغربی بنگال کی وزیر اعلیٰ ممتا بنرجی جمعہ کو وزیر اعظم نریندر مودی سے ملاقات کے لئے ان کی رہائش گاہ پہنچیں۔ اس کے بعد ممتا بنرجی اور پی ایم مودی کے درمیان ملاقات ہوئی۔ یہ میٹنگ ایسے وقت میں ہو رہی ہے جب ای ڈی نے بنگال میں ممتا حکومت کے سابق وزیر پر شکنجہ کس دیا ہے۔میٹنگ کے دوران، ممتا بنرجی نے منریگا، پردھان منتری آواس یوجنا اور پردھان منتری گرامین سڑک یوجنا سمیت اسکیموں کے نفاذ کے لیے ریاست کو فوری طور پر فنڈز جاری کرنے کا مطالبہ کیا۔ ان اسکیموں پر مرکزی حکومت کی طرف سے بقایا رقم تقریباً 17996 کروڑ روپے ہے۔
اس لیے اسے جلد از جلد جاری کیا جائے۔ اس کے علاوہ ممتا نے کئی ترقیاتی اور فلاحی اسکیموں کے لیے مناسب رقم (تقریباً 1,00,968.44 کروڑ روپے) دینے کی بھی درخواست کی۔انہوں نے کہا کہ اتنی بڑی رقم بقایا ہونے کی وجہ سے ریاستی امور کی انجام دہی میں انتہائی دشواری کا سامنا ہے۔ ریاست کے لوگوں کا خیال رکھنے میں بھی مسئلہ ہے۔دراصل، ممتا بنرجی جمعرات کی سہ پہر کولکاتہ سے نئی دہلی کے دورے پر روانہ ہوئیں۔ اس کے بعد وہ گزشتہ روز شام کو دہلی پہنچیں، یہ دورہ چار روز تک جاری رہے گا۔
اس دوران وہ کئی سینئر اپوزیشن لیڈروں سے مل سکتی ہیں۔ ممتا آج صدرجمہوریہ دروپدی مرمو سے بھی ملاقات کریں گی۔ ذرائع کے مطابق دہلی پہنچتے ہی ممتا نے پارٹی کے ممبران پارلیمنٹ سے ملاقات کی اور پارلیمنٹ کے اجلاس کی مکمل تفصیلات لیں۔ انہوں نے 2024 کے عام انتخابات کے روڈ میپ پر بھی بات کی۔ انہوں نے مغربی بنگال کے سات نئے اضلاع کے ناموں پر ارکان پارلیمنٹ سے تجاویز بھی طلب کیں۔
