بہار: گوپال گنج میں دولہے کی کار نے 7 کو کچلا، 2 ہلاک، 5 زخمی

گوپال گنج،7اپریل:(اردودنیا.اِن/ایجنسیز)بہار کے گوپال گنج ضلع کے وشوامبھار پور تھانہ علاقہ میں ایک شادی کی خوشیاں اس وقت ماتم میں تبدیل ہو گئیں جب دولے کی کار ے قابو ہو گئی اور بارات دیکھنے کے لئے آئے 7 افراد اس کے نیچے آ گئے۔ اس واقعہ میں دو خواتین ہلاک ہو گئی ہیں، جبکہ پانچ دیگر زخمی ہوئے ہیں۔ زخمیوں میں سے تین کی حالت تشویش ناک بتائی جاتی ہے۔پولیس کے مطابق لکشمی پور گاؤں میں سلیم میاں کی بیٹی کے نکاح کے لیے کچائے کوٹ تھانہ کے بٹھوا گاؤں سے بارات آئی تھی۔ بارات میں دولہے کی کار اچانک بے قابو ہو گئی اور اس نے متعدد افراد کو روند ڈالا۔ اس دوران دروازے پر کھڑے ہو کر بارات دیکھ رہی خواتین میں بھگدڑ مچ گئی۔ڈپٹی سپرنٹنڈنٹ آف پولیس سنجیو کمار نے بتایا کہ زخمیوں میں سے تین خواتین کو ابتدائی علاج کے بعد گورکھ پور ریفر کر دیا گیا ہے۔ واقعہ کے بعد سے ہی دولہا فرار ہے اور پولیس معاملہ کی جانچ پڑتال کر رہی ہے۔