پرندے دوست خاتون ’بھاویہ‘: پرندوں سے محبت کی انوکھی مثال

حیدرآباد :(اردودنیا.اِن/ایجنسیز) آسمان پر اُڑتے پرندوں کو دیکھ کر ہر کسی کا دل خوش ہوجاتا ہے اور اکثر لوگ یہ خواہش کرتے ہیں کہ کاش وہ بھی ان پرندوں کے ساتھ کھیل سکیں۔ کھمم شہر کے دھنسالا پورم کے قریب رہنے والی بی بھاویہ اس خواب کو حقیقت میں بدل رہی ہیں۔بھاویہ ایک سرکاری ملازم ہیں اور ان کے بہترین دوست کوئی انسان نہیں بلکہ پرندے ہیں۔ وہ پرندے جو ان کی آواز سنتے ہی فوراً اڑ کر آجاتے ہیں، اور اپنی مدھر چہچہاہٹ سے پورے ماحول کو خوشگوار بنا دیتے ہیں۔

جب بھاویہ شام کو گھر واپس آتی ہیں تو ان کے پرندے انہیں “اماں” کہہ کر پکارتے ہیں اور ان کے ہاتھ پر آکر بیٹھ جاتے ہیں۔ یہ منظر دیکھنے والا ہوتا ہے۔بھاویہ کے پاس ایک افریقی گرے طوطا ہے جو تقریباً ڈیڑھ سال قبل کیرالا سے لایا گیا تھا۔ اس نایاب پرندے کی قیمت تقریباً ایک لاکھ روپئے بتائی جاتی ہے۔ یہ طوطا انسانوں کی طرح چھوٹے چھوٹے الفاظ بولتا ہے، مگر جب یہ کسی نئے شخص کو دیکھتا ہے تو غصہ میں آجاتا ہے۔

اس کے علاوہ بھاویہ کے پاس گرین چک کونور اور سن کونور نسل کے خوبصورت پرندے بھی موجود ہیں، جنہیں وہ بہت پیار سے پالتی ہیں۔

بھاویہ کے گھر میں صرف پرندے ہی نہیں بلکہ دو پالتو کتے بھی ہیں — لابراڈار ریئر بور اور گولڈن ریئریور — جو ان کے پیارے پرندوں کی حفاظت کے ذمہ دار ہیں۔

بھاویہ اپنے ان پرندوں کی خوراک، پانی، اور صحت کا خاص خیال رکھتی ہیں۔ ان کی زندگی کی سب سے بڑی خوشی یہی ہے کہ جب وہ گھر آتی ہیں تو ان کے پرندے ان کا استقبال کرتے ہیں اور ماحول کو خوشی سے بھر دیتے ہیں۔