کانگریس کے منشور سے بھاجپا خوف زدگی کا شکار ہوگئی: محبوبہ مفتی

سری نگر، 24اپریل :(اردودنیانیوز.کام/ایجنسیز)پی ڈی پی کی صدر محبوبہ مفتی نے بدھ کے روز کہا کہ لوک سبھا انتخابات کے لیے کانگریس کا منشور عوامی مفاد میں ہے اور بی جے پی اس سے گھبراگئی ہے اور وہ فرقہ وارانہ کشیدگی کو ہوا دینے کی کوشش کر رہی ہے۔ بھاجپا اپنی ’’مودی کی گارنٹی ‘‘ سے مایوسی نظر آ رہی ہے۔یہاں ایک انتخابی ریلی سے خطاب کرنے کے بعد نامہ نگاروں سے بات کرتے ہوئے سابق وزیر اعلیٰ نے کہاکہ انڈیا اتحاد کے منشور میں کہا گیا ہے کہ خواتین کو 50 فیصد ریزرویشن دیا جائے گا، کسانوں کو ایم ایس پی دیا جائے گا، جس کی وجہ سے این ڈی اے گھبراہٹ کی شکار ہے۔

(انڈیا) اتحاد اچھا کام کر رہا ہے۔اننت ناگ-راجوری حلقہ سے عام انتخابات میں حصہ لے رہی مفتی نے کہا کہ 70 سالوں میں یہ پہلا موقع ہے کہ ایسا اچھا، عوام دوست منشورجاری کیا گیا ہے جس میں غریب لوگوں، بے روزگار نوجوانوں اور کسانوں کی بات کی گئی ہے۔انہوں نے کہاکہ اس سے وہ (بی جے پی) بے چین ہو گئے ہیں اور بی جے پی لیڈر ہندو مسلم کشیدگی کو فروغ دینے کے لیے بیانات جاری کر رہے ہیں۔ یہ ان کی مایوسی کو ظاہر کرتا ہے۔اس سے پہلے کولگام میں عوامی ریلی سے خطاب کرتے ہوئے محبوبہ مفتی نے کہا کہ یہ الیکشن معمولی مدعے پر نہیں بلکہ ہمارے اجتماعی تشخص کی لڑائی ہے۔ پی ڈی پی کارکنوں کا مقروض ہے جو کولگام کے فریسال میں بڑی تعداد میں نکلے۔ جیت ہماری ہوگی ۔