گولہ باری بند ہونے کے بعد یوکرین میں ہلاک ہونے والے ہندوستانی طالب علم کی نعش ہندوستان لائی جائے گی:وزیر اعلی بسواراج بومئی

کرناٹک ،08؍مارچ :(اردودنیا.اِن/ایجنسیاں)جنگ زدہ یوکرین میں گزشتہ ہفتے گولہ باری سے ہلاک ہونے والے ہندوستانی طالب علم نوین شیکھرپا کی نعش کے حوالے سے کرناٹک کے وزیر اعلیٰ بسواراج بومئی کا بیان سامنے آیا ہے۔ وزیر اعلی بسواراج بومئی نے کہاکہ وزیر خارجہ ڈاکٹر ایس جے شنکر نے ہمیں بتایا ہے کہ نوین کی نعش کو یوکرین کے مردہ خانے میں رکھا گیا ہے۔

گولہ باری بند ہونے کے بعد ان کی نعش کو ہندوستان لایا جائے گا۔نوین کرناٹک کے ہاویری ضلع کے چلگیری کا رہنے والا تھا۔ 22 سالہ نوین کھارکیو میڈیکل کالج میں چوتھے سال کا طالب علم تھا۔ روس اور یوکرین کے درمیان جاری جنگ کی وجہ سے نوین اپنے کچھ ساتھیوں کے ساتھ کھارکیو میں ایک بنکر میں چھپا ہوا تھا۔ لیکن جب وہ کھانے پینے کی اشیاء اور پیسے بدلنے کے لیے باہر نکلا تو فائرنگ میں اس کی موت ہوگئی تھی۔