ماڈل دیویا پاہوجا کی نعش قتل کے 11 دن بعد نہر سے برآمد، ہریانہ پولیس کو ملی کامیابی

نئی دہلی، 13جنوری :(اردودنیانیوز.کام/ایجنسیز)پولیس نے گروگرام کی ماڈل دیویا پاہوجا کی نعش برآمد کر لی ہے۔ نعش کی تلاش کے لیے این ڈی آر ایف کی 25 رکنی ٹیم پٹیالہ پہنچی تھی۔ رپورٹ کے مطابق این ڈی آر ایف کی ٹیم گروگرام اور پنجاب پولیس کے ساتھ پٹیالہ سے کھنوری سرحد تک نہر میں نعش کی تلاش کر رہی تھی، لیکن دیویا پاہوجا کی نعش ہریانہ کے ٹوہانہ نہر سے برآمد ہوئی، نعش کو نہر سے نکالنے کے بعد پولیس نے دیویا کے گھر والوں کو اس کی تصویر بھیجی، جسے دیکھ کر انہوں نے لنعش کی شناخت کی۔ گروگرام کرائم برانچ کی چھ ٹیمیں نعش کی تلاش میں مصروف تھیں۔خیال رہے کہ دیویا کو 2 جنوری کو گروگرام کے دی سٹی پوائنٹ ہوٹل کے کمرہ نمبر 111 میں گولی مار کر ہلاک کر دیا گیا تھا۔

یہ واقعہ ہوٹل کے مالک ابھیجیت سنگھ نے انجام دیا۔ اس معاملے میں مغربی بنگال سے گرفتار بلراج نامی ملزم سے پوچھ گچھ کے بعد ہریانہ پولیس دیویا پاہوجا کی نعش برآمد کرنے میں کامیاب رہی۔ بلراج نے خود پولیس کے سامنے اعتراف کیا تھا کہ اس نے دیویا کی نعش ہریانہ کی ٹوہانہ نہر میں پھینکی تھی۔ دراصل دیویا پاہوجا قتل کیس کے اہم ملزم ابھی جیت سنگھ نے نعش کو ٹھکانے لگانے کا کام اپنے معاون بلراج گل کو سونپا تھا۔بلراج ملک چھوڑ کر بنکاک فرار کا منصوبہ بنا رہا تھا۔ اسے اور روی بنگا کو کولکاتا ایئرپورٹ سے گرفتار کیا گیا۔ بلراج گل نے دیویا کی نعش اپنے باس ابھی جیت کی بی ایم ڈبلیو کار کے ٹرنک میں ڈالی تھی اور اسے ٹھکانے لگانے کے لیے نکلے تھے۔ اس کام میں روی بنگا ان کا ساتھ دے رہے تھے۔ ابھی جیت سنگھ نے اپنے ہوٹل کے دو عملے کے ساتھ مل کر دیویا کی نعش کو کمبل میں لپیٹ کر اپنی بی ایم ڈبلیو کار کی ڈکی میں رکھا۔

پھر اس نے گاڑی کی چابیاں اپنے خاص معاون بلراج کے حوالے کیں اور نعش کو ٹھکانے لگانے کو کہا۔ ابھی جیت نے اسے اس کام کے لیے 10 لاکھ روپے بھی دیے تھے۔گروگرام کرائم برانچ نے اس قتل کیس میں 6 ملزموں کو نامزد کیا ہے، جن میں کلیدی ملزم ابھی جیت سنگھ، ہیم راج، اوم پرکاش، میگھا، بل راج گل اور روی بنگا کے نام شامل ہیں۔ ان تمام کو گرفتار کر لیا گیا ہے۔ دیویا پاہوجا (27) بلدیو نگر، گروگرام کی رہنے والی تھیں۔ ان کی چھوٹی بہن نینا نے میڈیا کو بتایا تھا کہ دیویا کے ساتھ ان کی آخری بات چیت 2 جنوری کو دوپہر 12 بجے کے قریب ہوئی تھی۔ دیویا نے کہا تھا کہ وہ آدھے گھنٹے میں گھر پہنچ جائے گی، لیکن جب وہ شام 6 بجے تک واپس نہیں آئی تو گھر والوں کو شک ہوا کہ کچھ برا ہوا ہے۔ نینا کی شکایت پر گروگرام کے سیکٹر 14 تھانے میں قتل کا مقدمہ درج کیا گیا تھا۔