بارہ بنکی ، 25 جولائی:(اردودنیا.اِن/ایجنسیاں)یوپی کے بارہ بنکی میں پیر کی صبح ایک بڑا حادثہ پیش آگیا۔ پوروانچل ایکسپریس وے پر کھڑی ایک ڈبل ڈیکر بس کو دوسری بس نے زوردار ٹکر مار دی۔ حادثے میں 8 مسافر موقع پر ہی جاں بحق جبکہ 18 زخمی ہوگئے۔ مرنے والوں میں دو خواتین اور ایک بچہ بھی شامل ہے۔ حادثہ اتنا شدید تھا کہ آدھی ڈبل ڈیکر بس کو نقصان پہنچ گیا۔یہ حادثہ لونک ترا تھانہ علاقہ کے نریندر پور مدرہا گاؤں کے قریب پیش آیا۔
دونوں بسیں بہار سے دہلی جا رہی تھیں۔
پولیس اور انتظامی اہلکار موقع پر موجود ہیں۔ ریسکیو ٹیم راحت اور بچاؤ کے کاموں میں مصروف ہے۔ زخمیوں کو بارہ بنکی کے تین کمیونٹی ہیلتھ مراکز سے لکھنؤ ٹراما سنٹر ریفر کیا گیا ہے۔بس بہار کے سیتامڑھی سے دہلی جا رہی تھی۔اے ایس پی منوج پانڈے نے بتایا کہ ایک ڈبل ڈیکر بس (یو پی 17 اے ٹی 1353) اتوار کو بہار کے سیتامڑھی ضلع کے پوپری شہر سے دہلی کے لیے روانہ ہوئی تھی۔ بس پیر کی صبح 4 بجے بارہ بنکی ضلع کے پوروانچل ایکسپریس وے پر نریندر پور مدراہ گاؤں کے قریب کھڑی تھی۔ بس میں سوار مسافر کینٹین میں چائے اور ناشتہ کر رہے تھے۔آدھے گھنٹے بعد صبح 4:50 بجے اچانک تیز رفتاری سے آنے والی ایک اور بس نے ڈبل ڈیکر بس کو ٹکر مار دی۔
حادثے میں ہلاک ہونے والے تمام افراد متاثرہ بس کے مسافر بتائے جاتے ہیں، جو بہار سے دہلی جا رہی تھی۔ایک مسافر نے بتایا کہ میں اس بس میں تھا جس کے ڈرائیور نے ہماری بس کو ٹھوکر ماری،بس میں زیادہ تر لوگ سو رہے تھے۔ بس میں سوار بہار کے رہنے والے اشوک کمار نے کہا کہ میں ہاتھ دھونے گیا تھا۔ اس کے بعدکینٹین کے سامنے پہلی ڈبل ڈیکر کے ڈرائیور نے بس کو پارکنگ میں نہیں کھڑا کیا اور ہائی وے کے کنارے کھڑا کر دیا۔ اس کی وجہ سے پیچھے سے آنے والی دوسری تیز رفتار وولوو بس بے قابو ہو کر اس سے ٹکرا گئی۔
پیچھے سے آنے والی بس کے مسافر جاں بحق اور زخمی ہو گئے کیونکہ پہلے سے کھڑی بس کے مسافر کینٹین میں جا چکے تھے۔پولیس سپرنٹنڈنٹ انوراگ وتس نے کہاکہ 18 زخمیوں کو لکھنؤ ٹراما سینٹر ریفر کیا گیا ہے۔ معمولی زخمی ہونے والے مسافروں کو سی ایچ سی حیدر گڑھ میں علاج کے بعد گھر بھیج دیا گیا ہے۔ ساتھ ہی باقی مسافروں کو ان کے گھر بھیجنے کے انتظامات کیے جا رہے ہیں۔
