پٹنہ :(اردودنیا.اِن/ایجنسیاں)بہار میں کورونا لاک ڈاؤن میں 1 جون تک توسیع کردی گئی ہے۔ یہ ریاست میں تیسرا لاک ڈاؤن ہے۔ سی ایم نتیش کمار نے یہ معلومات سوشل میڈیا پر شیئر کی ہیں۔ انہوں نے لکھا کہ لاک ڈاؤن کو کورونا انفیکشن کے پیش نظر 5 مئی 2021 سے تین ہفتوں کے لئے نافذ کیا گیا تھا۔ ساتھی وزیروں اور عہدیداروں کے ساتھ آج اس صورتحال کا ایک بار پھر جائزہ لیا گیا۔
لاک ڈاؤن کا اچھا اثر پڑا ہے اور ایسا لگتا ہے کہ کورونا انفیکشن میں کمی آرہی ہے، بالآخربہار میں 25 مئی سے ایک ہفتہ کے لئے یعنی یکم جون 2021 تک لاک ڈاؤن جاری رکھنے کافیصلہ کیا گیا ہے ۔ریاست میں کورونا وائرس کی دوسری لہر کے پیش نظر وزیر اعلی نے پہلی بار 5 مئی سے 15 مئی تک لاک ڈاؤن کا اعلان کیاتھا۔ لاک ڈاؤن کا اعلان دوسری بار 16 سے 25 مئی تک اور اب تیسری بار 26 مئی سے یکم جون تک کیا گیا ہے۔
اس طرح سے بہار میں مجموعی طور پر 27 دن کا لاک ڈاؤن ہوگیاہے۔ریاست میں لاک ڈاؤن سے پہلے یومیہ اوسطا 10000 سے زیادہ کوویڈ کیس درج ہورہے تھے ، لیکن لاک ڈاؤن کے بعد ریاست میں صورتحال میں بہتری آئی ہے۔ اتوار کے روز 4002 نئے کیسزدرج ہوئے ہیں ۔ تاہم گزشتہ 24 گھنٹوں میں 107 افراد ہلاک ہوچکے ہیں۔ ریاست میں صحت یابی کی شرح میں بھی بہتری آئی ہے۔
