ڈیلاس، 24 جون:(اردودنیا.اِن/ایجنسیز) پرتگال کے سپر اسٹار فٹبالر کرسٹیانو رونالڈو نے فیفا ورلڈ کپ 2026 میں ایک اور تاریخی سنگِ میل عبور کر لیا۔ ازبکستان کے خلاف میچ میں صرف چھٹے منٹ میں گول کرکے رونالڈو نے عالمی ریکارڈ اپنے نام کر لیا۔
رونالڈو کا یہ فیفا ورلڈ کپ 2026 میں پہلا گول تھا، تاہم اس گول نے انہیں فٹبال کی تاریخ میں منفرد مقام دلایا۔ وہ دنیا کے پہلے کھلاڑی بن گئے ہیں جنہوں نے چھ مختلف فیفا ورلڈ کپ ٹورنامنٹس میں گول کرنے کا اعزاز حاصل کیا ہے۔
پرتگالی کپتان نے میچ کے آغاز میں ہی شاندار کراس پر گیند کو جال کی راہ دکھائی اور اپنی ٹیم کو برتری دلائی۔ گول کے بعد رونالڈو نے بھرپور انداز میں جشن منایا، جو ان کے اطمینان اور خوشی کی عکاسی کر رہا تھا۔
اس تاریخی گول کے ساتھ رونالڈو نے پرتگال کے لیے فیفا ورلڈ کپ میں سب سے زیادہ گول کرنے کا ریکارڈ بھی اپنے نام کر لیا۔ انہوں نے پرتگال کے لیجنڈری فٹبالر یوسیبیو کا ریکارڈ توڑ دیا، جن کے نام ورلڈ کپ میں 9 گول تھے۔ رونالڈو اب ورلڈ کپ کی تاریخ میں پرتگال کے لیے 10 گول اسکور کر چکے ہیں۔
اپنے پہلے میچ میں گول کرنے میں ناکام رہنے والے رونالڈو نے ازبکستان کے خلاف صرف چھ منٹ میں گول کرکے نہ صرف دباؤ ختم کیا بلکہ ایک نیا عالمی ریکارڈ بھی قائم کر دیا۔ اب شائقین کی نظریں ان پر مرکوز ہیں کہ آیا وہ اپنے گولز کی تعداد میں مزید اضافہ کر پاتے ہیں یا نہیں۔
