زیرہ اجوائن کا پانی: اکسیر صحت

زیرہ اور اجوائن بر صغیر کے باورچی خانوں میں عام استعمال ہونے والے مسالے ہیں جو روایتی پکوانوں کو خوشبودار اور خوش ذائقہ بناتے ہیں لیکن ان کی طبی افادیت بھی مسلمہ ہے۔ ان دونوں مسالوں کو اگر رات بھر پانی میں بھگو کر اور صبح نتھار کر پی لیا جائے یا ابال کر چائے کی طرح نوش کیا جائے تو صحت کو یہ مختلف طریقے سے فائدہ پہنچتا ہے۔ جسمانی وزن اگر بڑھا ہوا ہے تو زیرہ اور اجوائن کا عرق پینے سے وزن کم ہو سکتا ہے کیونکہ اس سے غذا کے جسم میں انجذاب کا عمل بہتر ہو جاتا ہے، بھوک میں کمی آجاتی ہے، ہاضمہ بہتر ہو جاتا ہے اور جسم سڈول رہتا ہے۔ ان دونوں مسالوں کے عرق سے جسمانی سوزش میں کمی آتی ہے اور کمر، پیٹھ اور گردن میں درد کم ہو جاتا ہے، ہمارے جسم میں جو مختلف فاسد مادے جمع ہو جاتے ہیں اور مختلف بیماریوں کا سبب بنتے ہیں، زیرہ اجوائن کا عرق جسم کو ان زہریلے مادوں سے نجات دلاتا ہے۔

ایک طرف یہ زہر یلے مادے جسم سے خارج ہو جاتے ہیں اور دوسری طرف جگر کی کار کردگی بہتر ہو جاتی ہے اجوائن اور زیرے میں جو اینٹی آکسیڈنٹ اجزا ہوتے ہیں وہ خون میں کولیسٹرول کم کرنے میں مدد کرتے ہیں اور دورانِ خون بہتر ہو جاتا ہے د یہ دونوں مسالے خون میں شکر کی سطح کو بھی معتدل رکھتے ہیں، انسولین کی حساسیت بڑھاتے ہیں اور گلو کوز کے انجذاب کو بہتر کرتے ہیں۔

زیرہ اور اجوائن سے تیار مشروب امراض تنفس میں بھی مفید ہے۔ اس کی جراثیم کش خصوصیات سانس کی نالیوں کے انفیکشن کا خاتمہ کرتی ہیں، ان مسالوں کے ست میں چونکہ کئی اینٹی آکسیڈنٹ اجزا شامل ہوتے ہیں، اس لئے انفیکشن کے خلاف یہ ایک تریاق ہے۔ زیرہ اور اجوائن کو نظام ہضم کے لئے سب سے موثر گردانا جاتا ہے، اس لیے جو لوگ پیٹ کے مختلف مسائل سے دوچار ہوتے ہیں مثلاً جن کے پیٹ میں گیس جمع ہو جاتی ہے، کھٹی ڈکاریں آتی ہیں، ریاح کے اخراج سے پریشانی اور پشیمانی کا سامنا رہتا ہے، وہ اس مشروب سے بہت زیادہ فائدہ اٹھا سکتے ہیں، زیرہ اور اجوائن جلد کو بے داغ اور پر کشش رکھنے میں بھی معاونت کرتے ہیں۔ جلد کیل مہاسے جھریوں اور سلوٹوں سے محفوظ اور تنی ہوئی شاداب رہتی ہے۔