دہی بھلے

اجزاء: ماش کی دال آدھا پائو، زیرہ دو چائے کے چمچ، ہرا دھنیا دو کھانے کے چمچ، کالی مرچ ایک چوتھائی چائے کا چمچ، لال مرچ آدھا چائے کا چمچ، چاٹ مسالہ ایک چائے کا چمچ، تیل حسب ضرورت۔

ترکیب: ماش کی دال کو چار گھنٹے تک بھگوئیں اور ادرک کے ساتھ چوپر میں ڈال کر پیس لیں۔ ان میں نمک اور مرچ حسب ذائقہ ڈال کر پیسٹ بنا لیں، پھر اس کے چھوٹے چھوٹے کباب بنا لیں۔ کڑاہی میں دہی بڑوں کے ان کبابوں کو تل لیں۔ اب دہی میں نمک، زیرہ،کٹا ہوا ہرا دھنیا، کالی مرچ اور لال مرچ ڈال کر پھینٹ لیں۔ سرونگ ڈش میں دہی بھلے ڈال کر اوپر دہی کا مکسچر پھیلائیں اور چاٹ مسالہ اور ہرا دھنیا چھڑک کر پیش کریں۔

چائنیز دہی بھلے

اجزاء: دہی آدھا کلو، مایونیز ایک کپ، کریم ایک پیک، سفید چنے (ابلے ہوئے) ایک کپ، میکرونی (ابلی ہوئی) ایک کپ، آلو (ابلے ہوئے) دو عدد درمیانے، گاجراور شملہ مرچ (باریک کٹی ہوئی) حسبِ ضرورت، پیاز(باریک کٹی ہوئی) حسبِ ضرورت، چکن (بون لیس) ایک پاؤ، سفید مرچ حسبِ ضرورت، نمک حسب ذائقہ۔

ترکیب: بون لیس چکن کو سویا سوس اور سرکا لگا کر تھوڑی دیر کے لئے رکھ دیں۔ دہی کو ایک باؤل میں ڈال کر پھینٹ لیں لیکن دھیان رہے کہ دہی کھٹا نہ ہو۔ اس میں سفید مرچ اور نمک مکس کریں، پھر اس میں کریم اور مایونیز ڈال کر مکس کریں۔ اب اس میں باریک کٹی ہوئی گاجریں اور شملہ مرچ شامل کردیں۔ کٹی ہوئی پیاز،ابلے چنے،ابلے آلو اور ابلی ہوئی میکرونی شامل کریں۔ اب فرائی پین میں ایک چمچ تیل ڈالیں اور اس میں چکن پکائیں۔ تھوڑی دیر کے لئے اسے ڈھک دیں تاکہ یہ گل جائے۔ اب اس کو بھی دہی میں شامل کر کے سب چیزیں مکس کرلیں۔ تھوڑی دیر فریج میں رکھیں اور اس کے بعد کھا لیں۔

دہی پکوڑا چاٹ

اجزاء: دہی ایک کلو، بیسن ایک پاؤ، لہسن چھ جوئے، پیاز ایک عدد، ہری مرچ چھ عدد، پسی ہوئی لال مرچ حسب ذائقہ، ادرک چھوٹا ٹکڑا، نمک حسب ذائقہ، میٹھا سوڈا ایک چمچ، سیاہ زیرہ حسب ضرورت، گھی، حسب ذائقہ۔

ترکیب: پہلے بیسن میں لہسن، پیاز، ادرک اور ہری مرچ پیس کر ملا لیں اور پھر اس میں سوڈا، نمک اور پسی ہوئی لال مرچ ڈال کر گھول لیں۔ اسے آدھا گھنٹہ بھگوئے رکھیں اور اس کے بعد کڑاہی میں تیل گرم کرلیں۔ آنچ ہلکی رکھ کر پکوڑے تل لیں۔ بادامی رنگ ہونے پر انہیں نمک ملے ہوئے ٹھنڈے پانی میں ڈالتے جائیں۔ دہی میں تھوڑا سا پانی ملا کر اسے خوب پھینٹ لیں اور پھر نمک،مرچ اور سیاہ زیرہ ڈال دیں۔ اب پکوڑے نچوڑ کر اس میں ڈالتے جائیں، چند منٹ تک بھیگا رہنے دیں۔ لیجیے نہایت مزیداردہی کی مسالہ دا رپکوڑا چاٹ تیار ہے۔

کدو کا رائتہ

درکار اجزاء: کدو آدھا کلو، دہی ایک کلو، نمک حسب ذائقہ، لال مرچ حسب ذائقہ، پیاز (باریک کٹی ہوئی) ایک عدد چھوٹی سی، کالی مرچ (پسی ہوئی) چٹکی بھر، زیرہ چٹکی بھر، دھنیا یا پو دینہ(باریک کاٹ لیں) چند ڈنڈیاں۔

ترکیب: کدو کو کدو کش کر کے ابال لیں اور ٹھنڈا کر کے نچوڑ لیں۔ دہی میں نمک، لال مرچ، زیرہ اور کالی مرچ ڈالیں، پھر پیاز کدو کش کر کے شامل کر یں اور خوب پھینٹ لیں۔ اب اس میں ابلا ہوا کدو شامل کر دیں اور اچھی طرح ملا لیں۔ اوپر کٹا ہوا دھنیا یا پو دینہ ڈال دیں۔ لیجئے کدو کا رائتہ پیش کرنے کے لئے تیار ہے۔