نئی دہلی11جنوری:(اردودنیا.اِن/ایجنسیاں) مرکزی حکومت نے انکم ٹیکس ریٹرن داخل کرنے کی آخری تاریخ 15 مارچ تک بڑھا دی ہے۔ یہ اطلاع وزارت خزانہ کے محکمہ ریونیوکی طرف سے جاری کردہ نوٹیفکیشن میں دی گئی ہے۔ اسی مناسبت سے کورونا وائرس کی صورتحال کے باعث ٹیکس دہندگان کو درپیش مشکلات کے پیش نظر تاریخ میں توسیع کی گئی ہے۔
نوٹیفکیشن میں یہ بھی کہا گیا ہے کہ انکم ٹیکس ایکٹ 1961 کی دفعات کے تحت مختلف آڈٹ رپورٹس کی ای فائلنگ کے دوران درپیش مسائل کی وجہ سے آخری تاریخ میں بھی توسیع کی گئی ہے۔ ٹیکس دہندگان اب 15 مارچ 2022 تک ITR فائل کر سکیں گے۔
حکومت کا یہ فیصلہ حیران کن ہے۔ گزشتہ سال دسمبر کے آخر میں حکومت نے کہا ہے کہ انکم ٹیکس ریٹرن داخل کرنے کی آخری تاریخ میں توسیع کی کوئی تجویز نہیں ہے اور اس کی آخری تاریخ 31 دسمبر 2021 ہے۔ انہوں نے بتایا تھاکہ اس بار ریٹرن داخل کرنے والوں کی تعداد پچھلے سال سے زیادہ ہے۔
