دہلی ہائی کورٹ میں سمیر وانکھیڑے کی عرضی پر سماعت، شاہ رخ خان کے پروڈکشن ہاؤس ریڈ چلیز اور نیٹ فلکس کو نوٹس جاری

 نئی دہلی:(اردودنیا.اِن/ایجنسیز)دہلی ہائی کورٹ نے سابق این سی بی افسر سمیر وانکھیڑے کی جانب سے دائر کردہ ہتک عزت کی درخواست پر سماعت کرتے ہوئے شاہ رخ خان کے پروڈکشن ہاؤس ریڈ چلیز انٹرٹینمنٹ اور نیٹ فلکس کو نوٹس جاری کر دیا ہے۔

عدالت نے واضح کیا کہ دونوں فریقین کو 7 دنوں کے اندر اپنا تحریری جواب داخل کرنا ہوگا۔ اس کے ساتھ ہی درخواست گزار سمیر وانکھیڑے کو ہدایت دی گئی ہے کہ وہ تمام مدعا علیہان کو درخواست کی کاپی فراہم کریں۔ کیس کی اگلی سماعت 30 اکتوبر 2025 کو مقرر کی گئی ہے۔

سمیر وانکھیڑے نے اپنی عرضی میں الزام لگایا ہے کہ شاہ رخ خان کے بیٹے آریان خان کی ہدایت کاری میں بننے والی نیٹ فلکس ویب سیریز ’The Ba***ds of Bollywood‘ میں ان کی ساکھ کو جان بوجھ کر نقصان پہنچانے کی کوشش کی گئی ہے۔ان کے مطابق، اس سیریز کا مقصد انہیں عوامی طور پر بدنام کرنا ہے، جبکہ آریان خان سے متعلق کیس ابھی عدالت میں زیر سماعت ہے۔

وانکھیڑے نے نہ صرف شاہ رخ خان بلکہ ان کی اہلیہ گوری خان اور بیٹے آریان خان کے خلاف بھی مقدمہ دائر کیا ہے۔ انہوں نے نیٹ فلکس اور ریڈ چلیز انٹرٹینمنٹ سے 2 کروڑ روپے ہرجانے کا مطالبہ کیا ہے۔انہوں نے کہا کہ ویب سیریز میں دکھائے گئے مناظر نے ان کی ساکھ اور پیشہ ورانہ کردار کو متاثر کیا ہے، جو ہتک عزت کے زمرے میں آتا ہے۔

ہائی کورٹ نے تمام فریقین سے جواب طلب کرتے ہوئے واضح کیا ہے کہ معاملے کی اگلی سماعت 30 اکتوبر 2025 کو ہوگی، جس میں عدالت یہ طے کرے گی کہ کیا اس ویب سیریز کی نشر و اشاعت پر عبوری پابندی عائد کی جا سکتی ہے۔