امریکہ میں غیر قانونی مقیم ہندوستانی تارکین وطن کی ’امریکہ بدری‘ شروع

نیویارک،4فروری :(اردودنیا.اِن/ایجنسیز)ٹرمپ انتظامیہ نے امریکہ میں غیر قانونی طور پر مقیم بھارتیوں کو ملک بدر کرنا شروع کردیا۔بھارتی میڈیا کے مطابق ٹرمپ انتظامیہ نے ابتدا میں 205 غیر قانونی بھارتی تارکین وطن کو ملک بدر کیا جنہیں امریکی فوجی طیارے کے ذریعے امرتسر پہنچایا جائے گا۔ میڈیا کا بتانا ہے کہ امریکی فوج کا سی 17 ائیرکرافٹ 205 بھارتیوں کو لے کر روانہ ہوگیا ہے،جب کہ ڈی پورٹ کیے جانے والے تمام بھارتی شہریوں کی مکمل تصدیق کی گئی ہے۔

رپورٹس کے مطابق ٹرمپ انتظامیہ امریکی تاریخ کے سب سے بڑے ڈی پورٹ پروگرام پر عمل کررہی ہے جس میں امریکی امیگریشن اینڈ کسٹم انفورسمنٹ نے ایک ابتدائی فہرست تیار کی ہے جس میں بتایا گیا ہے کہ 18 ہزار بھارتی شہری بغیر قانونی دستاویزات کے امریکہ میں مقیم ہیں۔رپورٹس کے مطابق امریکہ میں تقریباً 7 لاکھ 25 ہزار بھارتی تارکین وطن غیر قانونی طور پر رہ رہے ہیں جو غیر قانونی تارکین وطن کی تیسری بڑی تعداد ہے۔

امریکی صدر ڈونالڈ ٹرمپ کے احکامات کے بعد امریکہ نے غیر قانونی تارکین وطن کو نکالنا شروع کر دیا ہے۔ پیر کے روز ایک امریکی فوجی طیارہ تارکین وطن کو لے کر امریکہ سے ہندوستان روانہ ہوگیا۔ نام ظاہر نہ کرنے کی شرط پر ایک امریکی اہلکار نے یہ جانکاری دی ہے۔ خبر رساں ادارے روئٹرز نے ایک امریکی اہلکار کے حوالے سے بتایا ہے کہ C-17 فوجی طیارہ تارکین وطن کے ساتھ روانہ ہو گیا ہے۔ اہلکار نے یہ بھی کہا کہ یہ طیارہ کم از کم 24 گھنٹے سے پہلے نہیں آئے گا۔ٹرمپ امیگریشن پر بہت سخت موقف اختیار کر رہے ہیں، یہ ان کے بڑے انتخابی وعدوں میں سے ایک ہے۔ اب تک امریکہ مہاجرین کو لے جانے والے چھ طیارے لاطینی امریکہ بھیج چکا ہے۔ ان میں سے صرف چار طیارے گوئٹے مالا میں اترنے میں کامیاب ہوئے۔یا درہے کہ ٹرمپ نے گزشتہ ماہ کہا تھا کہ تاریخ میں پہلی بار، ہم غیر قانونی تارکین وطن کا سراغ لگا رہے ہیں، انہیں فوجی طیاروں میں لوڈ کر رہے ہیں، اور انہیں واپس بھیج رہے ہیں جہاں سے وہ آئے تھے۔وہیں دوسری جانب امریکی صدر ڈونالڈ ٹرمپ نے وزیر اعظم مودی کے ساتھ اپنی بات چیت کے بعد کہا تھا کہ جب امریکہ سے غیر قانونی ہندوستانی تارکین وطن کو واپس لانے کی بات آتی ہے تو وزیر اعظم‘‘وہ کریں گے جو صحیح ہے’’۔ بلومبرگ نیوز نے رپورٹ کیا ہیکہ ہندوستان اور امریکہ نے تقریباً 18,000 ہندوستانی تارکین وطن کی شناخت کی ہے جو غیر قانونی طور پر امریکہ میں ہیں۔

امریکہ کی طرف سے جاری کردہ زیادہ تر H-1B ویزا ہندوستانی لوگوں کو دیئے جاتے ہیں۔ ٹرمپ نے اپنی انتخابی مہم کے دوران یہ بھی کہا تھا کہ جب میں دوبارہ منتخب ہوجاؤں گا تو ہم امریکی تاریخ کی سب سے بڑی ملک بدری مہم شروع کریں گے۔وہیں دوسری جانب ٹرمپ اکثر اپنے امیگریشن ایجنڈے کو نافذ کرنے کے لیے فوج کا استعمال کرتے نظرآرہے ہیں۔ انہوں نے فوج کو امریکہ-میکسیکو کی سرحد پر بھیجا ہے، تارکین وطن کو رکھنے کے لیے فوجی اڈے استعمال کیے ہیں، اور انھیں امریکہ سے باہر بھیجنے کے لیے فوجی ہوائی جہاز استعمال کیے ہیں۔

تارکین وطن کو ملک سے نکالنے کے علاوہ ٹرمپ کے ٹیرف نے بھی دنیا کو مشکل میں ڈال دیا ہے۔ ٹرمپ نے کینیڈا، میکسیکو اور چین پر محصولات عائد کیے ہیں،حالانکہ اس کو ایک ماہ کیلئے ملتوی کردیا ہے،لیکن چین پر برقرار رکھا ہے۔ اب وہ یورپی یونین (EU) پر بھی ٹیرف لگانے جا رہے ہیں۔ تاہم انہوں نے برطانیہ کو اس فیصلے سے مستثنیٰ قرار دینے کا عندیہ دیا ہے۔