واشنگٹن :(اردودنیا.اِن/ایجنسیاں)سوشل میڈیا پر وائرل ہونے والی ایک مختصر ویڈیو دیکھ کر لوگ حیران ہیں کہ خرگوش (Easter Bunnyـ) کے بھیس میں یہ نامعلوم شخص کون ہے جو امریکی صدر جو بائیڈن پر حکم چلاتے ہوئے انہیں ایک سے دوسری جگہ جانے کےلیے کہہ رہا ہے۔
یہی نہیں بلکہ بائیڈن بھی کسی سعادت مند بچے کی طرح اس کا حکم مانتے ہوئے اُسی طرف چل دیتے ہیں کہ جس طرف چلنے کےلیے وہ خرگوش انہیں اشارہ کرتا ہے۔ٹوئٹر پر اپلوڈ کی گئی ان دونوں ویڈیوز میں الگ الگ زاویئے سے اس خرگوش کو بائیڈن پر حکم چلاتے دیکھا جاسکتا ہے۔
امریکی میڈیا کے مطابق، یہ ویڈیو پیر 18 اپریل کے روز وائٹ ہاؤس میں ایسٹر کی خصوصی تقریب ’’ایسٹر ایگ رول‘‘ کے موقع پر بنائی گئی تھی۔جو بائیڈن اس تقریب میں موجود لوگوں سے بات چیت کر رہے تھے کہ افغان رپورٹر ناظرہ کریمی نے ان سے پاکستان اور افغانستان کے بارے میں سوال کردیا۔
بائیڈن نے اس سوال کا جواب دینا شروع کیا ہی تھا کہ ایسٹر بنی (ایسٹر خرگوش) کے بھیس میں ایک نامعلوم شخص تیزی سے وہاں آ پہنچا اور ’’ایسٹر بنی آگیا ہے!‘‘ کا نعرہ بلند کرتے ہوئے، امریکی صدر کو دوسری طرف چلنے کا اشارہ کیا۔لوگوں کو زیادہ حیرت اس بات پر ہوئی کہ جو بائیڈن نے بھی بلا چوں و چرا کیے اس خرگوش کا حکم مانا اور وہاں سے چل پڑے۔
Why is the Easter Bunny directing the President of the United States 🥲🥲🥲🥲🥲🥲🥲🥲 pic.twitter.com/9bgXQJ6EXW
— Abigail Marone 🇺🇸 (@abigailmarone) April 18, 2022
سوشل میڈیا پر قیاس آرائیاں شروع ہوگئیں کہ یہ خرگوش غالباً وائٹ ہاؤس کا کوئی طاقتور اور انتہائی بااختیار عہدیدار ہے۔اس حوالے سے کئی نام بھی لیے گئے لیکن بالآخر معلوم ہوا کہ وہ خرگوش کوئی مرد نہیں بلکہ خاتون تھیں جن کا نام میگن ہیز ہے۔میگن ہیز امریکی صدر کی خصوصی معاون اور وائٹ ہاؤس میں سرکاری پیغام رسانی (میسج) سے متعلق شعبے کی ڈائریکٹر بھی ہیں۔
اپنے اسی عہدے کی بناء پر ایسٹر ایگ رول میں انہوں نے جو بائیڈن کو ایک بے موقع سوال کا جواب دینے سے باز رکھا اور دوسری طرف چلنے کا اشارہ کیا۔
Biden was incoherently mumbling about Afghanistan… so now we know why the Bunny ran over to interrupt… pic.twitter.com/FthqFIgvHQ
— Abigail Marone 🇺🇸 (@abigailmarone) April 18, 2022
بائیڈن بھی فوراً یہ اشارہ سمجھ گئے اور دوسری جانب چل پڑے۔ لیکن سوشل میڈیا صارفین نے اسی معمولی سی بات کا بتنگڑ بنا کر یہ ویڈیو وائرل کروا دی۔
