کیرالہ میں شدید گرمی! کئی علاقوں میں درجہ حرارت 54 ڈگری سے تجاوز، اموات کا خطرہ

ترواننت پورم، 10مارچ:(اردودنیانیوز.کام/ایجنسیز) مارچ کا مہینہ ابھی شروع ہوا ہے لیکن ابھی سے ہی عوام کو جون کی شدید گرمی کا سامنا ہے۔ ملک کی کئی ریاستوں میں شدید گرمی اپنا پرانا ریکارڈ توڑ رہی ہے ،اور گرمی کے باعث لوگوں کا گھروں سے نکلنا مشکل ہو گیا ہے۔ ساحلی راست کیرالہ میں بھی شدید گرمی شروع ہو گئی ہے۔ جمعرات (9 مارچ) کو کیرالہ اسٹیٹ ڈیزاسٹر مینجمنٹ اتھارٹی کی تیار کردہ رپورٹ کے مطابق ریاست کے کچھ مقامات پر درجہ حرارت 54 ڈگری سیلسیس ریکارڈ کیا گیا ہے۔

ایسی صورتحال میں سنگین امراض کا خطرہ لاحق ہے اور آنے والے دنوں میں ہیٹ اسٹروک (لو لگنا) کا امکان ہے۔کے ایس ڈی ایم اے کی رپورٹ کے مطابق ترواننت پورم ضلع کے جنوبی سرے اور الاپوزا، کوٹائم اور کنور اضلاع کے کچھ علاقوں میں زیادہ سے زیادہ درجہ حرارت 54 ڈگری سیلسیس سے زیادہ ریکارڈ کیا گیا۔ اس کے علاوہ کولم، کوٹائم، ایرناکولم، کوزیکوڈ اور کنور کے بڑے علاقوں میں بھی درجہ حرارت 45 سے 54 ڈگری سیلسیس ریکارڈ کیا گیا۔ انتظامیہ کے مطابق ان مقامات پر ہیٹ اسٹروک کا امکان ہے۔