چوری شدہ Fabergé لاکٹ ملزم نے نگل لیا، پولیس نے حیران کن طور پر برآمد کر لیا

 آکلینڈ :(اردودنیا.اِن/ایجنسیز)نیوزی لینڈ کے شہر آکلینڈ میں ایک حیران کن چوری کا واقعہ سامنے آیا ہے، جہاں ایک شخص نے Fabergé ڈیزائن کا قیمتی لاکٹ چوری کرنے کے بعد اسے وہیں موقع پر نگل لیا۔ اس لاکٹ کی قیمت 33,585 نیوزی لینڈ ڈالر یعنی تقریباً 17 لاکھ بھارتی روپے بتائی جا رہی ہے۔

واقعہ سینٹرل آکلینڈ کے پیٹریج جیولرز میں پیش آیا، جہاں 32 سالہ شخص نے لاکٹ اٹھایا اور چند لمحوں میں اسے نگل کر دکان سے نکلنے کی کوشش کی۔ دکان کے اسٹاف کی اطلاع پر پولیس نے چند منٹ کے اندر ملزم کو گرفتار کر لیا۔ پولیس کے مطابق ملزم کو طبی نگرانی میں رکھا گیا اور لاکٹ بعد میں قدرتی طور پر برآمد ہو گیا۔

جیولر کے مطابق Fabergé کا یہ لاکٹ نہایت باریک کاریگری سے تیار کیا گیا ہے، جس میں 60 سفید ہیرے اور 15 نیلے نیلم جڑے ہوئے ہیں۔ لاکٹ کھولنے پر اس کے اندر سے 18 قیراط سونے کا ایک چھوٹا سا آکٹوپس نکلتا ہے، جو اس کی نایابی اور قیمت میں اضافہ کرتا ہے۔

پولیس نے چور کے خلاف باقاعدہ چوری کا مقدمہ درج کر لیا ہے۔ حکام کا کہنا ہے کہ ملزم کو طبی مدد فراہم کی گئی تھی اور چونکہ وہ پولیس کی تحویل میں تھا، اس لیے اس کی مسلسل نگرانی ضروری تھی۔

Fabergé دنیا بھر میں اپنی نفیس اور قیمتی جیولری کے لیے شہرت رکھتا ہے۔ اس کے خصوصی ڈیزائن کردہ لاکٹ اور آرٹ پیسز عموماً نایاب ہوتے ہیں اور عالمی سطح پر کلیکٹرز میں بے حد مقبول ہیں۔