گھاس، گڑ اور پتھر سے ’نقلی زیرہ‘ بنانے کی فیکٹری کا پردہ فاش

دہلی پولیس کی اسپیشل کرائم برانچ کی ٹیم نے 210 کلوگرام جعلی زیرہ برآمد کیا

نئی دہلی 20اکتوبر:(اردودنیا.اِن/ایجنسیاں)ہندوؤں کا خصوصی تہوار دیوالی کا تہوار عنقریب ہے، جس کے پیش نظر ملاوٹ خور بھی لوگوں کی صحت سے کھلواڑ کرنے کے لئے سرگرم ہو گئے ہیں۔ اسی ضمن میں دہلی پولیس نے نقلی زیرہ بنانے والی فیکٹری کا پردہ فاش کیا ہے۔ دہلی پولیس نے کنجھوالا کے مدن پور روڈ پر نقلی زیرہ بنانے والی فیکٹری کا پردہ فاش کیا ہے اور اس میں استعمال ہونے والی اشیا کی بڑی مقدار ضبط کی ہے۔رپورٹ کے مطابق پولیس نے گھاس، گڑ اور پتھر کے پاؤڈر سے نقلی زیرہ تیار کرنے والی فیکٹری کا پردہ فاش کیا ہے۔ زیرے کی 348 بوریاں ٹرک سے اور 55 بوریاں گودام سے برآمد کی گئی ہیں، اس کے علاوہ 35 بوریاں گھاس، 25 بوری گڑ، 25 بوری پتھر کا پاؤڈر برآمد کیا ہے۔

قارئین کے لئے یہ جان لینا ضروری ہے کہ اصلی اور نقلی زیرے میں کیا فرق ہوتا ہے؟

زیرہ کو پہچاننے کے لیے ایک پیالے میں پانی لیں اور زیرہ ڈال کر چھوڑ دیں۔ اگر زیرہ رنگ چھوڑنے لگے اور ٹوٹنے لگے تو سمجھ لیں کہ یہ نقلی ہے۔ خیال رہے کہ اصلی زیرہ کو پانی میں ڈالنے سے اس میں کوئی تبدیلی نہیں آتی۔ اصلی زیرہ کو اس کی منفرد خوشبو سے بھی پہچانا جا سکتا ہے۔نقلی زیرہ استعمال کرنا صحت کے لئے انتہائی مضر ہے۔ اس کے استعمال سے قوت مدافعت کمزور ہو سکتی ہے اور معدے سے متعلق کئی مسائل بھی پیدا ہو سکتے ہیں۔ نقلی زیرہ کھانے سے پتھری اور جلد کے مسائل کا بھی سامنا کر سکتے ہیں۔

موبائل گیمنگ ایپ فراڈ:ملزم عامر خان کے ساتھی سے 1.6 کروڑ روپے نقد اور 7 کروڑ کے بٹ کوائن برآمد

کولکاتہ، 20اکتوبر :(اردودنیا.اِن/ایجنسیاں)انفورسمنٹ ڈائریکٹوریٹ (ای ڈی) نے ای نگیٹس کے ماسٹر مائنڈ اور کروڑوں روپے کے موبائل گیمنگ ایپ فراڈ کے کلیدی ملزم عامر خان کے ایک معاون کے گھر سے 1.6 کروڑ روپے نقد اور 7 کروڑ روپے بٹ کوائنز برآمد کیے ہیں۔ یہ ضبطی بدھ کی دیر رات کولکاتا کے الٹا ڈانگا میں رومین اگروال کی رہائش سے کی گئی۔ ای ڈی حکام نے رومین اگروال کو حراست میں لے لیا اور ان کی رہائش سے کئی ڈائریاں اور ایک لیپ ٹاپ بھی ضبط کیا۔ سازش کا ایک اور ملزم امیش اگروال ابھی تک مفرور ہے۔ای ڈی ذرائع نے بتایا کہ ضبط کئے گئے لیپ ٹاپ اور ڈائریوں سے انہوں نے کئی رابطوں کی تفصیلات حاصل کی ہیں جن کے بارے میں خیال ہے کہ وہ دھوکہ دہی کا حصہ ہیں۔ اس تازہ ضبطی کے ساتھ ہی ای ڈی اور کولکاتا پولیس کی مجموعی ضبطی 141.47 کروڑ روپے تک پہنچ گئی۔

اس معاملے کی جانچ 10 ستمبر کو شروع ہوئی جب ای ڈی نے جنوبی کولکاتا کے گارڈن ریچ علاقے میں واقع شاہی اصطبل لین میں واقع کلیدی ملزم عامر خان کے والد نصر خان کے گھر سے 17.32 کروڑ روپے برآمد کئے تھے۔ اس وقت تک عامر فرار تھا۔ بعد ازاں کولکاتا پولیس نے عامر خان کو اتر پردیش کے غازی آباد سے گرفتار کیا۔ سٹی پولیس نے اس کے پانچ قریبی ساتھیوں کو بھی گرفتار کر لیا ہے۔خان کا ایک اور قریبی ساتھی سبھوجیت شریمانی مفرور ہے اور سٹی پولیس نے اس کے خلاف لک آؤٹ نوٹس جاری کیا ہے۔ خیال کیا جاتا ہے کہ اس نے حال ہی میں دبئی میں پناہ لی ہے۔

عامر خان نے ای نگیٹس کے نام سے ایک موبائل گیمنگ ایپلی کیشن لانچ کیا تھا، جسے عوام کو دھوکہ دینے کے مقصد سے ڈیزائن کیا گیا تھا۔شروعات میں صارفین کو کمیشن سے نوازا گیا اور بیلنس بغیر کسی پریشانی کے نکالا جا سکتا تھا، جس سے انہیں اعتماد حاصل ہوا اور انہوں نے زیادہ فیصد کمیشن اور زیادہ تعداد میں خریداری کے لیے بڑی رقم کی سرمایہ کاری شروع کر دی۔ عوام سے کافی رقم جمع کرنے کے بعد اس ایپ سے پیسے نکالنے پر کسی نہ کسی بہانے پابندی لگا دی گئی۔ اس کے بعد پروفائل کی معلومات سمیت تمام ڈیٹا ایپ سرور سے مٹا دیا گیا۔