جعلی پین کارڈ معاملہ: ایس پی رہنما اعظم خان اور ان کے بیٹے کو سپریم کورٹ سے ملی ضمانت

نئی دہلی ،10؍اگست :(اردودنیا.اِن/ایجنسیاں)سپریم کورٹ نے ایک عبوری حکم میں سماجوادی پارٹی کے رہنما #اعظم خان اور ان کے بیٹے عبداللہ خان کو ایک فوجداری کیس میں ضمانت دے دی ہے۔ #سپریم کورٹ نے کہا ہے کہ #اترپردیش کی متعلقہ نچلی عدالت کو چار ہفتوں کے اندر اس کیس میں شکایت کنندہ کا بیان ریکارڈ کرنے کے بعد ضمانت پر رہا کیا جائے۔ یہ کیس جعلی پین کارڈ سے متعلق ہے۔

الہ آباد ہائی کورٹ کی جانب سے ضمانت مسترد ہونے کے بعد رکن پارلیمنٹ اعظم خان اور ان کے بیٹے عبداللہ اعظم نے سپریم کورٹ میں ضمانت کی درخواست دائر کی تھی۔ عبداللہ اعظم کے دو پین کارڈ اور پاسپورٹ کے معاملے میں عدالت نے ضمانت کی درخواست مسترد کر دی تھی۔یہ دونوں مقدمے بی جے پی کے مغربی اترپردیش کے کنوینر آکاش سکسینا نے کرائے تھے ۔

#عبداللہ اعظم کے دو پیدائشی سرٹیفکیٹ حاصل کرنے کے معاملے میں ایم پی اعظم خان اور عبداللہ کے خلاف مقدمہ درج کیا گیا جس میں اعظم خان کی اہلیہ سٹی ایم ایل اے ڈاکٹر تزئین فاطمہ کا نام بھی تھا۔ اس کے علاوہ یہ رپورٹ پاسپورٹ اور پین کارڈ میں دو تاریخ پیدائش دکھانے کے الزامات کی وجہ سے بھی دائر کی گئی تھی۔ ان مقدمات کی سماعت میں ملزمان کی ضمانت کی درخواستیں مسترد کر دی گئیں، جس کی وجہ سے اعظم خان اور ان کے بیٹے عبداللہ نے سپریم کورٹ سے رجوع کیا تھا۔