سکھ مخالف فسادات: سابق کانگریس ایم پی سجن کمار کو قتل کیس میں عمر قید کی سزا

نئی دہلی ::(اردودنیا.اِن/ایجنسیز)سکھ مخالف فسادات (1984) سے متعلق سرسوتی وہار تشدد کیس میں قصوروار ٹھہرائے گئے کانگریس کے سابق رکن پارلیمنٹ سجن کمار کو دہلی کی راؤس ایونیو عدالت نے عمر قید کی سزا سنائی ہے۔ دہلی پولیس اور متاثرین نے اس کیس میں سجن کمار کے خلاف سزائے موت کا مطالبہ کیا۔پولیس نے عدالت میں داخل اپنے تحریری دلائل میں کہا تھا کہ یہ معاملہ نربھیا کیس سے زیادہ سنگین ہے۔ نربھیا معاملے میں ایک خاتون کو نشانہ بنایا گیا تھا، لیکن یہاں ایک خاص برادری کے لوگوں کو نشانہ بنایا گیا۔

دہلی پولیس کی طرف سے یہ بھی دلیل دی گئی کہ 1984 میں سکھوں کا قتل عام انسانیت کے خلاف جرم تھا۔ اس تشدد کے دوران ایک مخصوص کمیونٹی کو نشانہ بنایا گیا۔ اس فساد نے سماج کے ضمیر کو جھنجھوڑ کر رکھ دیا تھا۔آپ کو بتا دیں کہ اس معاملے میں دہلی کی راؤس ایونیو کورٹ نے حال ہی میں سجن کمار کو مجرم قرار دیا تھا، سجن کمار کو دوسری بار عمر قید کی سزا سنائی گئی ہے۔ وہ پہلے ہی دہلی کینٹ کیس میں عمر قید کی سزا کاٹ رہے ہیں۔

یکم نومبر 1984 کو دہلی کے سرسوتی وہار علاقے میں دو سکھ جسونت سنگھ اور ان کے بیٹے تروندیپ سنگھ کو بے دردی سے قتل کر دیا گیا تھا۔اس واقعہ سے متعلق ایف آئی آر شمالی دہلی کے سرسوتی وہار پولیس اسٹیشن میں درج کی گئی ہے۔ یہ شکایت رنگناتھ مشرا کمیشن کے سامنے دیے گئے حلف نامے کی بنیاد پر درج کی گئی تھی۔

ناناوتی کمیشن کی رپورٹ کے مطابق ، جو فسادات کے بعد کی تحقیقات کے لیے تشکیل دیاگیا تھا، دہلی میں فسادات کے سلسلے میں 587 ایف آئی آر درج کی گئی تھیں جن میں 2,733 لوگوں کی ہلاکتیں ہوئیں۔ 587 ایف آئی آر میں سے صرف 28 مقدمات میں سزائیں ہوئیں، جن میں تقریباً 400 افراد کو سزا سنائی گئی۔

کمار سمیت تقریباً 50 افراد کو قتل کے الزام میں سزا سنائی گئی۔ کمار، ایک بااثر کانگریسی رہنما اور اس وقت کے ایک رکن پارلیمنٹ، بھی 1984 میں دہلی کی پالم کالونی میں 1 اور 2 نومبر کو پانچ افراد کے قتل کے معاملے میں ملزم تھے۔ انہیں دہلی ہائی کورٹ نے اس کیس میں عمر قید کی سزا سنائی تھی اور سزا کو چیلنج کرنے والی ان کی اپیل سپریم کورٹ میں زیر التوا ہے ۔ ایک اور اپیل دہلی ہائی کورٹ کے سامنے زیر التوا ہے کمار کو ٹرائل کورٹ کے ذریعے بری کیے جانے کے خلاف، جب کہ دہلی کی ایک عدالت اس وقت چوتھے مقدمے کی سماعت کر رہی ہے۔