اچھے دنوں کی بہار : نمکین کے پیکٹ سے لے کر صابن کے پیکٹ کی قیمت نہیں بڑھی ،مگر سائز کم ہوگیا

نئی دہلی،13مئی:(اردودنیا.اِن/ایجنسیاں)مسلسل بڑھتی مہنگائی کے درمیان کئی کمپنیوں نے اپنے پیکٹ کی قیمتوں میں اضافہ نہیں کیا۔ یہ اچھی بات ہے، لیکن یہ محض خام خیالی ہے ۔سچائی یہ ہے کہ انہوں نے پیکٹوں میں آنے والے سامان کی مقداراو ر وزن کم کردی ہے۔ صابن ہو یا وہ تمام چیزیں جو آپ روزمرہ کی زندگی میں استعمال کرتے ہیں۔ان کے پیکٹ یا پیک ہلکے ہیں ،کیوں کہ تقریباً تمام کمپنیوں نے اپنی مصنوعات کی مانگ کو برقرار رکھنے کے لیے یہ حکمت عملی اپنائی ہے۔ جب پیک ہلکا ہوتا ہے تو گاہک کو ایک جھٹکے میں مہنگائی محسوس نہیں ہوتی، جبکہ ریٹ بڑھنے سے مہنگائی نظر آتی ہے اور یہ بھی ممکن ہے کہ صارف اس چیز کو خریدنا چھوڑ دے۔

کمپنیاں مقررہ قیمت والی اشیاء کے وزن کو کم کر کے اعلیٰ ان پٹ قیمت ایڈجسٹ کر رہی ہیں۔ انہوں نے کم آمدنی والے اور دیہی علاقوں کے صارفین کو مدنظر رکھتے ہوئے ان مصنوعات کی قیمتوں میں اضافے کے بجائے سائز یا وزن کم کرنے کی پالیسی اپنائی ہے۔ خوردنی تیل، اناج اور ایندھن کی بڑھتی ہوئی قیمتوں کے درمیان، یونی لیور Plc کی ہندوستانی شاخ اور گھریلو اشیائے ضروریہ کی کمپنی کے علاوہ دیگر کمپنیوں نے اپنے سستے پیکیج کو ہلکا کر رہے ہیں۔ کمپنیوں نے یہ حکمت عملی ایک ایسے وقت میں اپنائی ہے جب ہندوستانی صارفی قیمت یعنی افراط زر گزشتہ چار مہینوں میں مرکزی بینک کے 6 فیصد سے اوپر چلی گئی ہے۔