نئی دہلی،09؍ فروری:(اردودنیا.اِن/ایجنسیاں) سپریم کورٹ نے مغربی بنگال کی نندی گرام قانون ساز اسمبلی سیٹ کے انتخابات میں وزیر اعلیٰ ممتا بنرجی کے انتخابی ایجنٹ رہے ایس کے سوپین کو بڑی راحت دی ہے،سپریم کورٹ نے کلکتہ ہائی کورٹ کے فیصلے کو برطرف کرتے ہوئے سوپین کو مشروط پیشگی ضمانت دے دی ہے۔
سوپین کو پولنگ کے بعد تشدد کیس میں کئی شرائط کے ساتھ پیشگی ضمانت ملی ہے۔جسٹس ایل ناگیشور راؤ اور جسٹس ابھے ایس اوک کی بنچ نے یہ فیصلہ دیا۔ اس سے پہلے 4 فروری کو سپریم کورٹ نے مغربی بنگال کی وزیر اعلیٰ ممتا بنرجی کے نندی گرام الیکشن ایجنٹ ایس کے سوپین کی پیشگی ضمانت پر فیصلہ محفوظ کر لیا تھا۔
سوپین کی جانب سے کپل سبل اور سی بی آئی کی جانب سے اے ایس جی امان لیکھی کے دلائل سننے کے بعد عدالت نے اپنا فیصلہ محفوظ رکھ لیا تھا۔تاہم سماعت کے دوران مغربی بنگال کی وزیر اعلیٰ ممتا بنرجی کے نندی گرام کے انتخابی ایجنٹ ایس کے سوپین کو پولنگ کے بعد کے تشدد میں قتل کے سلسلے میں گرفتاری سے عبوری تحفظ دیا گیا تھا۔
جسٹس ایل ناگیشور راؤ اور جسٹس بی آر گوئی کی بنچ نے حکم دیا تھا کہ کیس میں سوپین کی گرفتاری پر اگلے حکم تک پابندی رہے گی۔سپریم کورٹ کلکتہ ہائی کورٹ کے سوپین کی عرضی کو خارج کرنے کے حکم کے خلاف اپیل کی سماعت کر رہی تھی۔
واضح رہے کہ نندی گرام حلقہ میں بی جے پی کارکن کے قتل کی سی بی آئی جانچ کر رہی ہے۔مئی 2021 میں ریاستی اسمبلی کے انتخابات میں ممتا بنرجی کی زیرقیادت آل انڈیا ترنمول کانگریس کی جیت کے بعد مغربی بنگال میں تشدد کے دوران کارکن کی موت ہو گئی تھی۔
