فوڈ پوائزننگ سے 100 سے زیادہ طلباء کی بگڑی طبیعت، داخل شفاخانہ

نوئیڈا ،9مارچ:(اردودنیانیوز.کام/ایجنسیز)یوپی کے نوئیڈا میں 100 سے زیادہ بچے بیمار ہو گئے ہیں۔ یہاں، گریٹر نوئیڈا کے گوتم بدھ نگر کے ایک پرائیویٹ ہاسٹل میں رات کا کھانا کھانے والے طلباء نے الٹی اور چکر آنے کی شکایت کی۔ معلومات کے مطابق ہندو مذہبی تقریب مہاشیو راتری کے موقع پر فاسٹنگ فوڈ کھانے سے 100 سے زیادہ طلباء بیمار ہو گئے۔ معاملے میں پولیس نے کہا کہ مختلف کالجوں میں زیر تعلیم یہ طالب علم نالج پارک علاقے کی آرین ریزیڈنسی میں رہتے ہیں۔بہت سے طلباء نے جمعہ کی رات کھانے کے بعد بے چینی، چکر آنے اور الٹی کی شکایت کی۔

معاملے میں پولیس نے کہا کہ ہاسٹل میں مہاشیو راتری کے موقع پر ورت رکھنے والوں کے لیے تیار کی گئی گیہوں کے آٹے کی پوریاں کھانے سے 76 طالب علموں کی صحت بگڑ گئی، جس کے بعد ان سبھی کو مختلف اسپتالوں میں داخل کرایا گیا۔ تاہم فی الحال ان کی حالت مستحکم بتائی جاتی ہے۔پولیس نے کہا کہ معاملے کی جانچ کی جا رہی ہے۔ طلباء نے بتایا کہ انہوں نے رات کو ورت رکھنے والوں کے لیے الگ سے پکایا کھانا کھایا۔ ایک پرائیویٹ اسپتال میں زیر علاج ایک طالب علم پیوش نے کہا کہ ہم نے رات کا کھانا تقریباً 9.30 بجے کھایا۔ رات 10.30 بجے کے قریب مجھے چکر آنے لگے اور پھر میں سو گیا۔

کچھ دوستوں نے دیکھا کہ بہت سے دوسرے طالب علموں کو چکر آنا، بے چینی، الٹی کی شکایت تھی۔کیلاش اسپتال میں داخل ایک اور طالب علم کشال نے کہا کہ آدھی رات کے قریب میرا جسم کانپنے لگا اور مجھے بخار اور چکر آنے لگے۔ پھر مجھے اور میرے دو روم میٹ کو ایمرجنسی میں یہاں لایا گیا۔ دیگر طلباء بھی الٹیاں کر رہے تھے۔ اسی دوران مقامی فوڈ سیفٹی ڈیپارٹمنٹ کی ایک ٹیم معائنہ کے لیے موقع پر پہنچ گئی۔ ایک اہلکار نے میڈیا کو بتایاکہ ٹیم کھانے کی اشیاء اور کھانے کی تیاری میں استعمال ہونے والے خام مال کے نمونے جمع کرے گی۔ نمونوں کی جانچ کی جائے گی اور رپورٹ کی بنیاد پر قانونی کارروائی کی جائے گی، فی الحال معاملے کی مزید تفتیش کی جا رہی ہے۔