وارانسی ،20مئی:(اردودنیا.اِن/ایجنسیاں)عام دنوں کی نسبت آج ہزاروں افراد جمعہ کی نمازکی ادائیگی کے لیے گیان واپی مسجد پہنچے۔ مسجد کے اندر جگہ کی کمی کی وجہ سے وشوناتھ دھام کے گیٹ نمبر چار کے باہر جمع نمازیوں کوواپس کر دیا گیا اور گیٹ بند کر دیا گیا۔ جس کی وجہ سے کچھ دیر تک افراتفری کی صورتحال رہی۔ سیکورٹی کے پیش نظر سیکورٹی بڑھا دی گئی ہے۔ پولیس انتظامیہ الرٹ ہے۔خیال رہے کہ وارانسی کی گیان واپی مسجد میں جمعہ کی نماز کے حوالے سے انجمن انتظامیہ مسجد کمیٹی نے ایک خط جاری کرکے نمازیوں سے درخواست کی تھی کہ لوگ جمعہ کی نماز کے لیے کم تعداد میں گیان واپی مسجد آئیں۔ اس اپیل کا زیادہ اثر نہیں ہوا۔
بڑی تعداد میں لوگ نماز ادا کرنے گیان واپی پہنچ گئے۔ مسجد کمیٹی کی جانب سے اپیل کی گئی کہ وضو خانہ عدالتی حکم کے باعث سیل ہونے کی وجہ سے زیادہ لوگوں کا مسجد میں آنا مناسب نہیں ہوگا، اس لیے آپ سب اپنے اپنے علاقے میں جمعہ کی نماز ادا کریں۔ یہاں پولیس انتظامیہ بھی نماز جمعہ کے حوالے سے الرٹ ہے۔ نماز جمعہ کے آغاز سے لے کر آخر تک چوکس رہنے کی ہدایت دی گئی تھی۔
سروے کے بعد عدالت کے حکم سے گیان واپی مسجد کے وضو کی جگہ اور بیت الخلا پر نو تالے لگا کر اسے سیل کر دیا گیا ہے۔ جمعہ کی نماز ادا کرنے کے لیے گیان واپی مسجد میں نمازیوں کی بھیڑ عام دنوں سے کچھ زیادہ ہوتی تھی۔اس سلسلے میں گیان واپی مسجد کی نگرانی کرنے والی انجمن انصافیہ مسجد کمیٹی کے جوائنٹ سکریٹری ایس ایم یاسین نے ایک اپیل جاری کی تھی۔ جس میں کہا گیا ہے کہ گیان واپی کا معاملہ عدالت میں ہے۔ وضو خانہ اور بیت الخلا سیل ہونے کی وجہ سے نماز کے لیے آنے والے لوگوں کو پریشانی کا سامنا ہے۔
اس لیے اپنے علاقے میں نماز ادا کریں۔عدالت کے سامنے گیان واپی کا سروے شروع ہونے سے پہلے عام طور پر اتنے لوگ یہاں نماز پڑھنے نہیں آتے تھے۔ سروے کے بعد سے یہاں کافی بھیڑ جمع ہو رہی ہے۔ مقامی لوگوں نے بتایا کہ 6 مئی کو جب سروے شروع ہوا تو پہلی بار بڑی تعداد میں نمازی آئے تھے۔ اس کے بعد آج جمعے پر کافی بھیڑ دیکھی گئی۔ پہلے صرف 400 لوگ نماز پڑھنے آتے تھے۔ گیان واپی میں سروے کے تنازعہ کے بعد جمعے پر پہلے سے ہی زیادہ بھیڑ آنے کی امید تھی۔
اس سلسلے میں گیان واپی کی نگرانی کرنے والی انجمن انتظامیہ مسجد کمیٹی کے جوائنٹ سکریٹری ایس ایم یاسین نے مسلم معاشرے کے لوگوں سے کم سے کم تعداد میں آنے کی اپیل کی تھی۔یاسین نے کہاتھا کہ ہم نے لوگوں سے اپیل کی ہے کہ وہ بڑی تعداد میں گیان واپی مسجد میں نہ آئیں، بلکہ اپنے گھروں کے قریب کی مساجد میں جمعہ کی نماز ادا کریں۔دوسری طرف پولیس انتظامیہ کے افسران بھی مسلم سماج کے لوگوں سے رابطے میں رہے۔
