گیان واپی تنازعہ: مسلم فریق کو جھٹکا،عدالت سماعت کیلئے تیار

وارنسی ،12ستمبر:(اردودنیا.اِن/ایجنسیاں)وارانسی کے گیان واپی-سرینگر گوری تنازعہ کی مزید سماعت جاری رہے گی۔ وارانسی ڈسٹرکٹ کورٹ نے کہا کہ یہ معاملہ قابل سماعت ہے۔ گیان واپی مسجد کے احاطے میں واقع شرینگر گوری مندر میں پوجا کی اجازت دینے کی عرضی پر 24 اگست کو ہندو اور مسلم فریقوں کے دلائل مکمل ہوئے۔ اس کے بعد وارانسی کے ضلع جج اے کے وشویش نے فیصلہ 12 ستمبر یعنی آج تک محفوظ رکھا تھا۔وارانسی کی عدالت نے انجمن انتظامیہ مسجد کمیٹی کی عرضی (آرڈر 7 رول 11 سی پی سی کے تحت دائر کی گئی) کو مسترد کر دیا جس میں گیان واپی مسجد کے احاطے میں عبادت کا حق مانگنے والی پانچ ہندو خواتین (مدعی) کی طرف سے دائر مقدمے کی برقراری کو چیلنج کیا گیا تھا۔

ڈسٹرکٹ جج اے کے وشویشوا نے حکم دیا ہے کہ ہندو عبادت گزاروں کے ذریعہ دائر مقدمہ کو عبادت گاہوں کے قانون یا وقف ایکٹ کے ذریعہ روکا نہیں گیا ہے۔اس کے ساتھ ہی انجمن اسلامیہ کمیٹی کی جانب سے مقدمے کو برقرار رکھنے کا چیلنج مسترد کر دیا گیا ہے۔ اب ہندو عبادت گزاروں کے مقدمہ کی مزید سماعت وارانسی کی عدالت کرے گی۔ مدعیوں (ہندو عبادت گزار خواتین ) نے بنیادی طور پر کاشی وشوناتھ مندر کے ساتھ واقع مسجد کمپلیکس کی بیرونی دیوار پر ما شرینگر گوری کی پوجا کرنے کا حق طلب کیا تھا۔اسی مقدمہ کی برقراری کو انجمن کمیٹی (جو وارانسی میں گیان واپی مسجد کی دیکھ بھال کرتی ہے) نے یہ استدلال کرتے ہوئے چیلنج کیا تھا کہ ہندو عبادت گزاروں کے سوٹ کو قانون (عبادت کے مقامات ایکٹ، 1991) کے ذریعے روکا گیا ہے۔

فریقین کو طویل عرصے تک سننے کے بعد ڈسٹرکٹ جج اے کے وشویشا نے گزشتہ ماہ سماعت مکمل کی ، مدعیان نے دعویٰ کیا تھا کہ موجودہ مسجد کا احاطہ کسی زمانے میں ہندو مندر تھا اور اسے مغل حکمران اورنگ زیب نے منہدم کر دیا تھا اور اس کے بعد موجودہ مسجد کا ڈھانچہ وہیں بنایا گیا تھا۔ دوسری طرف انجمن مسجد کمیٹی نے اپنے اعتراض اور آرڈر 7 رول 11 سی پی سی کی درخواست میں دلیل دی ہے کہ اس مقدمے کو خاص طور پر عبادت گاہوں (خصوصی انتظامات) ایکٹ 1991 کے ذریعے روک دیا جانا چاہیے۔عدالت کے فیصلے کے دوران ہندو فریق کے وکلاء ہری شنکر جین اور وشنو شنکر جین عدالت میں موجود تھے۔ تاہم مرکزی درخواست گزار راکھی سنگھ عدالت میں موجود نہیں تھیں۔

کمرہ عدالت میں کل 62 افراد کو حاضر ہونے کی اجازت دی گئی۔ عدالت نے اس معاملے کی اگلی سماعت 22 ستمبر کو کرنے کا کہا ہے۔ وارانسی کے پولس کمشنر اے ستیش گنیش نے فیصلے سے پہلے کہا تھا کہ شہر کے حساس علاقوں میں دفعہ 144 نافذ ہے۔ شہر میں ہندو مسلم کی مخلوط آبادی والے علاقے میں پولیس فورس تعینات ہے۔ پولیس نے کل رات سے ہی کچھ علاقوں میں گشت بڑھا دیا تھا تاکہ حکم کے بعد امن و امان کی صورتحال خراب نہ ہو۔فیصلے کے پیش نظر پورے شہر کو ہائی الرٹ کر دیا گیا تھا۔ سوشل میڈیا پر نظر رکھی جا رہی تھی۔ ضلعی عدالت کے احاطے میں بم ڈسپوزل اسکواڈ اور ڈاگ اسکواڈ کو بھی خصوصی نگرانی میں تعینات کیا گیا تھا۔

سروے کے بعد ہندو فریق نے دعویٰ کیا کہ شیولنگ مسجد کے تہہ خانے میں موجود ہے جبکہ مسلم فریق نے اسے چشمہ بتایا تھا۔ہندو فریق کے مطابق 1669 میں اورنگ زیب نے کاشی وشوناتھ مندر کا ایک حصہ توڑ کر گیان واپی مسجد بنائی تھی۔ بعض مورخین کا کہنا ہے کہ 14ویں صدی میں جونپور کے شرقی سلطان نے مندر کو گرا کر گیان واپی مسجد بنائی تھی۔کچھ عقائد کے مطابق وشوناتھ مندر اور گیان واپی مسجد کو اکبر نے 1585 میں نئے مذہب دین الٰہی کے تحت بنایا تھا۔ مسجد اور وشوناتھ مندر کے درمیان 10 فٹ گہرا کنواں ہے جسے گیان واپی کہتے ہیں۔ مسجد کا نام اسی کنویں کے نام پر پڑاہے۔ہندو فریق کے دعوے کے مطابق پران میں کہا گیا ہے کہ بھگوان شیو نے خود یہ کنواں اپنے ترشول سے لنگ ابھیشیک کے لیے بنایا تھا۔ یہیں پر شیو نے اپنی بیوی پاروتی کو گیان عطا کیا تھا، اس لیے اس جگہ کا نام گیان واپی یعنی علم کا کنواں ہے۔مسلم فریق کا ماننا ہے کہ یہ وقف جائیداد ہے۔

جس کا نام شاہی مسجد عالمگیر کے نام ہے۔ مسجد کمیٹی کے جوابی دلائل 22 اگست سے جاری ہیں۔ مسلم فریق نے کہا کہ وقف بورڈ کی تشکیل 1936 میں ہوئی تھی۔ 1944 کے گزٹ میں انکشاف ہوا کہ گیان واپی مسجد کا نام شاہی مسجد عالمگیر ہے۔یہ جائیداد شہنشاہ عالمگیر یعنی اورنگ زیب کی تھی۔ بادشاہ عالمگیر کا نام وقف کے طور پر بھی درج تھا۔ اس طرح یہ مسجد 1669 میں شہنشاہ اورنگزیب کی طرف سے 1400 سال پرانے شرعی قانون کے تحت عطیہ کی گئی جائیداد پر بنائی گئی تھی اور اس کے بعد سے آج تک وہاں نماز ادا کی جا رہی ہے۔

گیانواپی کیس : کچھ اہم نکات ہندو فریق کے حق میں عدالتی فیصلہ ، مسلم فریق ہائی کورٹ کا دروازہ کھٹکھٹائے گا کیشوپرساد موریہ نے پھر کہا، متھرا- کاشی کروٹ لے رہی ہے !

 وپی کے وارانسی میں واقع گیان واپی مسجد اور شرینگر گوری معاملہ پر ضلعی عدالت نے ہندو فریق کے حق میں  پیرکے دن بڑا فیصلہ سنادیا ہے۔ عدالت نے اپنے فیصلے میں کہا کہ گیان واپی-سرینگر گوری کیس قابل سماعت ہے۔ اب اس معاملہ کی اگلی سماعت 22 ستمبر کو ہوگی۔ آج کی سماعت سے جڑے اہم نکات یوں ہیں ۔ ضلع جج اے کے وشویش کے سنگل بنچ نے گیان واپی شرینگر گوری تنازعہ کیس میں فیصلہ سناتے ہوئے کہا کہ معاملہ قابل غور ہے۔ ہندو فریق کے وکیل وشنو شنکر جین نے کہا کہ عدالت نے ہماری دلیل قبول کر لی ہے، جبکہ مسلم فریق کی درخواست کو عدالت نے مستردکردیا ہے ۔اب اس کیس کی اگلی سماعت 22 ستمبر کو ہوگی۔ درخواست گزار سوہن لال آریہ نے خوشی کا اظہار کرتے ہوئے کہا کہ یہ ہندو برادری کی جیت ہے، آج گیان واپی مندر کا سنگ بنیاد رکھنے کا دن ہے، ہم لوگوں سے امن برقرار رکھنے کی اپیل کرتے ہیں۔

وہیں ہندو فریق کے حق میں فیصلہ آنے کے بعد اب مسلم فریق اسے ہائی کورٹ میں میں چیلنج کرنے کا فیصلہ کیا ہے ۔وہیں مولوی مولانا خالد رشیدفرنگی محل نے کہا کہ بابری مسجد کے فیصلے کے دوران سپریم کورٹ نے عبادت ایکٹ کا حوالہ دیتے ہوئے جو باتیں کہی تھیں، ان سے ایسا محسوس ہوتا تھا کہ اب ملک میں مندر- مسجد کا مسئلہ ختم ہو گیا ہے، لیکن اس کے باوجود یہ مسائل جس طرح سے سامنے لائے جا رہے ہیں ، اس سے یہ خدشہ کہ ملک میں مندر- مسجد کے نام پر آئے دن مسئلے اٹھتے ہی رہیں گے ۔ہماری قانونی ٹیم اس کا تجزیہ کرے گی اور اگلا قدم اٹھائے گی۔ سینکڑوں سالوں سے لوگ وہاں نماز ادا کرتے آرہے ہیں، تمام لوگوںسے امن کی گزارش ہے ،یہ ایک قانونی مسئلہ ہے جس کا فیصلہ عدالت میں ہی ہونا ہے ۔ وہیں یوپی کے ڈپٹی سی ایم کیشو پرساد موریہ نے ٹویٹ کیا اور لکھا کہ متھرااور کاشی کروٹ لے رہی ہے ، خیال رہے کہ اس سے قبل بھی کاشی متھرا کے بارے میں یوپی کے ڈپٹی سی ایم کیشو پرساد موریہ متنازعہ بیان دے چکے ہیں ۔

وہیں مرکزی وزیر گری راج سنگھ نے کہا کہ ہم فیصلے کا احترام کرتے ہیں، ہم گیان واپی کا بھی احترام کرتے ہیں۔ اگلی سماعت میں بھی ہمیں قانون پر اعتماد ہے۔ نیزمرکزی وزیر پرہلاد جوشی نے بھی ہندو فریق کے حق میں عدالتی فیصلے کا خیر مقدم کیا ہے۔ انہوں نے ٹوئٹ کیا اور کہا کہ میں گیان واپی کیس میں ٹرائل سے متعلق وارانسی کورٹ کے حکم کا خیر مقدم کرتا ہوں، یہ ہندوؤں کی بڑی فتح ہے۔ یوپی کے دوسرے ڈپٹی سی ایم برجیش پاٹھک نے کہا کہ عدالت نے بہت اچھا فیصلہ دیا ہے۔ فیصلہ عوام کے جذبات کے مطابق ہے، اس لیے ریاست بھر میں خوشی کی لہر دوڑ گئی ہے۔

مجھے خوشی کے اظہار میں بہت سی کالیں آ رہی ہیں۔ مدھیہ پردیش کے وزیر اعلی شیوراج سنگھ چوہان نے بھی گیان واپی-شرینگر گوری تنازعہ کیس میں عدالت کے فیصلے پر خوشی کا اظہار کیا ہے۔ہندو فریق کے وکیل ایس این چترویدی کا کہنا ہے کہ کمیشن کی رپورٹ پر اگلی سماعت ہوگی۔ دیوار توڑکر سروے کیا جائے۔ کاربن ڈیٹنگ کرنے کو کہا جائے گا۔ اس بات کو یقینی بنایا جائے کہ اورنگ زیب نے جو مندر توڑا تھا وہ بھگوان وشویشور کی جگہ ہے، اور ہندوؤں کو اس کا حق ملنا چاہیے۔