گیانواپی سروے کا دوسرا دن اے ایس آئی آج ریڈی ایشن تکنیک سے کرے گی جانچ، جانیں پہلے دن کیا پایا؟

وارانسی ،5اگست :(اردودنیانیوز.کام/ایجنسیز) گیان واپی مسجد کے احاطہ کے اے ایس آئی سروے کا آج دوسرا دن ہے۔ ہندوستان کے محکمہ آثار قدیمہ (اے ایس آئی) کی ٹیم نے صبح 9 بجے سے دوبارہ اپنا سروے شروع کر دیا۔ آج ہندو یادگاروں اور دیواروں کی جانچ ریڈی ایشن (تابکاری) تکنیک کے ذریعے آگے بڑھائی جائے گی۔ سروے کے پیش نظر گیانواپی کے باہر حفاظتی انتظامات بڑھا دیئے گئے ہیں۔ اس سے پہلے جمعہ کو الہ آباد ہائی کورٹ اور پھر سپریم کورٹ سے گرین سگنل ملنے کے بعد ٹیم نے گیانواپی کا سروے شروع کیا۔پہلے دن نماز جمعہ کی وجہ سے صرف پانچ گھنٹے سروے کا کام ہو سکا۔ اس دوران ٹیم نے پورے کمپلیکس کا ڈیزائن تیار کیا اور دیواروں اور اطراف سے شواہد اکٹھے کئے۔ سروے ٹیم نے تینوں گنبدوں کے نیچے اور تہہ خانوں میں بھی جا کر سروے کا خاکہ تیار کیا۔ کل زیادہ تر کاغذی کام کیا گیا اور مختلف یادگاروں کی فوٹو گرافی اور ویڈیو گرافی کی گئی۔ سروے کے لیے اے ایس آئی کی 51 رکنی ٹیم کو گیان واپی میں چار حصوں میں تقسیم کیا گیا تھا۔

وہیں انجمن انتظامیہ مسجد کمیٹی نے جمعہ کے روز سروے سے دوری بنا کر رکھی۔ ان کا کوئی بھی نمائندہ سروے کے مقام پر نہیں پہنچا۔ اے ایس آئی کی ٹیم نے ثبوت اکٹھے کرنے کے لیے گیانواپی کے احاطے کے ہر کونے میں جا کر دیواروں، ستونوں اور نشانوں کی فوٹو گرافی اور ویڈیو گرافی کی۔ درمیان میں جمعہ کی نماز کی وجہ سے سروے کا کام کچھ دیر کے لیے روکنا پڑا تاہم آج سے سروے کا کام پھر  شروع ہوا۔اے ایس آئی کی ٹیم نے گیانواپی کیمپس کے چاروں کونوں پر ڈائل ٹیسٹ کے اشارے لگائے۔ جس سے سطح کی پیمائش کی گئی۔ دیواروں، ستونوں اور چھتوں کو سینٹ ورنیئر بیول پروٹریکٹر کی مدد سے چیک کیا گیا۔

اے ایس آئی کا یہ سروے پانچ دن تک چلے گا۔آپ کو بتا دیں کہ وارانسی کی ضلعی عدالت نے 21 جولائی کو گیانواپی کے اے ایس آئی سروے کی اجازت دی تھی، جس کے بعد مسلم فریق سروے کو روکنے کے لیے سپریم کورٹ پہنچ گیا اور سپریم کورٹ نے سروے پر 26 جولائی تک عبوری روک لگا دی۔ مسلم فریق نے الٰہ آباد ہائی کورٹ میں اپیل کرنے کو کہا۔ 27 اگست کو ہائی کورٹ میں سماعت کے بعد اس نے اپنا فیصلہ محفوظ رکھا اور 3 اگست کو چیف جسٹس پریتنکر دیواکر کی بنچ نے مسلم فریق کی عرضی کو مسترد کرتے ہوئے سروے پر پابندی لگانے سے انکار کردیا۔ اس کے بعد 4 اگست سے سروے شروع ہوا، لیکن مسلم فریق ایک بار پھر سپریم کورٹ پہنچ گیا، لیکن اسے سپریم کورٹ سے بھی جھٹکا لگا۔