گیان واپی کیس :ہندو تنظیموں نے مسجد کا لفظ ہٹا کر مندر چسپاں کردیا

نئی دہلی :(اردودنیانیوز.کام/ایجنسیز)  ہندو لیڈرس نے گیان واپی مسجد کے سائن بورڈ سے مسجد کا لفظ ہٹا کر مندر کا لفظ چسپاں کر دیا ہے۔سائن بورڈ سے گیان واپی کے سامنے موجود لفظ مسجد کو ہٹانے کی درخواست کی گئی تھی لیکن پوجا کی اجازت ملنے کے بعد ہندو لیڈروں نے سائن بورڈ سے مسجد کا لفظ ہٹا دیا ہے۔وارانسی ضلع عدالت کی جانب سے گیان واپی مسجد کے ویاس جی تہہ خانے میں پوجا کی ہدایت ملنے کے بعد راشٹریہ ہندو دل نامی تنظیم نے اب وشوناتھ مندر روڈ پر سائن بورڈ پر گیان واپی مسجد کی جگہ مندر کا پوسٹر لگادیا ہے۔

ہندو تنظیم نے اس سائن بورڈ پر اعتراض کرتے ہوئے ٹورازم ڈائریکٹوریٹ اور چیف منسٹرٰ کو خط لکھا تھا جس میں سائن بورڈ سے گیان واپی کے سامنے موجود لفظ مسجد کو ہٹانے کی درخواست کی گئی تھی۔قابل ذکر ہے کہ اس سے پہلے چہارشنبہ کی آدھی رات کو عدالتی حکم کی تعمیل کو یقینی بنانے کے لیے ضلع مجسٹریٹ، پولس کمشنر اور ڈویژنل کمشنر بھاری فورس کے ساتھ گیان واپی کامپلکس پہنچے اور نندی کے سامنے سے رکاوٹیں ہٹا کر ویاس جی کے تہہ خانے میں پوجا شروع کی۔

31 سال بعد ویاس جی کے تہہ خانے میں پوجا کی گئی ہے۔ چہارشنبہ کو ہی ضلع جج ڈاکٹر اجے کرشنا وشویش کی عدالت نے ویاس خاندان اور کاشی وشواناتھ ٹرسٹ بورڈ کے پجاری کو تہہ خانے میں واقع مورتیوں کی پوجا اور راگ بھگوگ کرنے کا حکم دیا تھا۔ کیس کی اگلی سماعت 8 فروری کو ہوگی۔ اس دوران مدعی اور مدعا علیہ فریق اعتراضات جمع کرا سکتے ہیں۔مقامی مسلمانوں نے ہندو تنظیموں کی اس حرکت کے خلاف سخت احتجاج کیا۔