نتساریم میں فلسطینیوں کی نعشوں، ہڈیوں کے ڈھانچوں اور وسیع تباہی کے اندوہناک مناظر

غزہ،10فروری :(اردودنیا.اِن/ایجنسیز)غزہ کی پٹی کے جنوب سے شمالی حصے میں واپس آنے والے بے گھر فلسطینیوں کو جہاں ایک طرف اپنے علاقوں میں لوٹنے کی خوشی ہے وہاں دوسری طرف یہ لوگ نتساریم راہ داری پر دل دہلا دینے والے مناظر دیکھ کر چونک گئے ہیں۔ یہ راہ داری غزہ کی پٹی کے شمال حصے کو جنوب سے علاحدہ کرتی ہے۔واپس آنے والے فلسطینیوں نے راستوں پر یا ملبے کے نیچے کٹی پھٹی انسانی نعشیں دیکھیں۔ فلسطینی ذرائع کے مطابق غزہ کی پٹی کے وسط میں نتساریم راہ داری سے اسرائیلی انخلا کے بعد متعدد شہریوں کی نعشیں اور ہڈیوں کے ڈھانچے ملے ہیں۔

اسی طرح تصاویر اور وڈیو کلپوں میں اس تباہی کا حجم سامنے آ رہا ہے جو اسرائیلی فوج نے نتساریم، المغراقہ اور جحر الدیک کے علاقوں میں وسیع پیمانے پر چھوڑا۔حماس کے ایک ذریعے کے مطابق وساطت کاروں نے تنظیم کو بتایا ہے کہ اسرائیل نے ملبے کے نیچے سے لاشیں نکالنے اور ملبہ ہٹانے کے لیے بھاری آلات اور ساز و سامان غزہ کی پٹی میں داخل کرنے کی ذمے داری لی ہے تاہم ابھی تک اس پر عمل نہیں ہوا۔ ذریعے نے بتایا کہ حماس اس حوالے سے صورت حال کا جائزہ لے رہی ہے۔ اگرچہ فائر بندی معاہدے کے پہلے ماہ کے اندر 2 لاکھ عارضی خیموں، 60 ہزار کیمپوں، ایندھن کی کافی مقدار اور ہسپتالوں کی بحالی کے سامان کو داخل کیا جانا تھا تاہم ابھی تک اس میں سے تھوڑی تعداد ہی آئی ہے۔ادھر اسرائیلی فوج نے کل اتوار کے روز نتساریم راہ داری سے اپنی فوج کا انخلا مکمل کر لیا۔