کتنی گرفتاریاں ہوئیں؟ سپریم کورٹ نے لکھیم پور کھیری تشدد پر سماعت کے دوران یوپی حکومت سے پوچھا

نئی دہلی،07 ؍اکتوبر: (اردودنیا.اِن/ایجنسیاں)اتر پردیش میں لکھیم پور کھیری کے واقعہ پر سماعت جمعرات کو سپریم کورٹ میں ہوئی۔ عدالت نے اس معاملے میں یوپی حکومت سے اسٹیٹس رپورٹ طلب کی ہے۔ عدالت نے حکومت سے کل تک رپورٹ داخل کرنے کو کہا ہے۔ کل دوبارہ سماعت ہوگی۔ سماعت کے دوران عدالت نے یوپی حکومت سے پوچھا کہ اس کیس میں اب تک کتنی گرفتاریاں ہوئی ہیں ، کتنے ملزم ہیں ، ان تمام معلومات کے ساتھ وہ کل رپورٹ درج کرے ۔

جب سماعت شروع ہوئی تو وکیل شیوکمار ترپاٹھی ، جنہوں نے اس کیس میں خط لکھا تھا انہوں نے عدالت میں کہا کہ لکھیم پور کھیری کے واقعہ میں کئی کسان مارے گئے ہیں۔ یہ انتظامیہ کی غفلت کی وجہ سے ہوا۔ عدالت کو اس معاملے میں مناسب کارروائی کرنی چاہیے۔ مجھے امید ہے کہ عدالت ہمارے خط کو سنجیدگی سے لے گی اور مجرموں کے خلاف کارروائی کرے گی۔

یہ انسانی حقوق کی خلاف ورزی کا معاملہ ہے۔اس پر چیف جسٹس نے یوپی حکومت سے جواب طلب کیا۔ یوپی حکومت نے آج عدالت میں کہا کہ یہ واقعہ افسوس ناک ہے۔ ایس آئی ٹی تشکیل دی گئی ہے۔ ایف آئی آر درج کر لی گئی ہے۔ ہم رپورٹ داخل کر سکتے ہیں۔ اس کے بعد عدالت نے ان سے کل تک رپورٹ داخل کرنے کو کہا ہے۔ یوپی حکومت کے بیانات پر چیف جسٹس نے کہا کہ لیکن الزامات یہ ہیں کہ آپ تحقیقات کو صحیح طریقے سے نہیں کر رہے ہیں۔

یوپی حکومت نے اس پر کہا کہ ہم نے اس معاملے میں ایک عدالتی کمیشن بھی تشکیل دیا ہے۔ معاملہ کل سماعت کے لیے رکھا جائے۔ ہم تمام جوابات دینے کی کوشش کریں گے۔ گرما پرساد نے یوپی کی طرف سے کہا کہ ہم نے ایک ایف آئی آر درج کی ہے۔ ہائی کورٹ کے ایک ریٹائرڈ جج کی سربراہی میں ایک تحقیقاتی ٹیم تشکیل دی گئی ہے۔

اس پر چیف جسٹس نے کہا کہ کل اس معاملے میں ریاستی حکومت سے بات کرنے کے بعد ہدایات لے کر آئیں اور ان کی تفصیلات اور اسٹیٹس رپورٹ درج کریں کہ اس معاملے کے بارے میں ہائی کورٹ میں کتنی درخواستیں دائر کی گئی ہیں۔ کتنی ایف آئی آر ، کتنے گرفتار ، کتنے ملزم سب کچھ بتائیں۔

جیسے ہی سماعت شروع ہوئی ، سپریم کورٹ نے رجسٹری سے کہا کہ یہ معاملہ مفاد عامہ کی درخواست کے طور پر درج کیا جائے۔ چیف جسٹس نے کہا کہ ہم نے یہ معاملہ ایڈوکیٹ شیو کمار ترپاٹھی اور سی ایس پانڈا کے خط پر درج کیا ہے۔ ہم نے اسے پی آئی ایل کے طور پر دائر کرنے کے لیے کہا تھا لیکن کچھ کنفیوزن کی وجہ سے یہ بطور ازخود رجسٹر ہو گیا۔

عدالت نے دونوں وکلاء کو پیش ہونے کو کہا ہے۔ چیف جسٹس (سی جے آئی) این وی رمنا کی بنچ اس کی سماعت کر رہی ہے۔ چیف جسٹس کے علاوہ جسٹس سوریا کانت اور جسٹس ہما کوہلی بھی بینچ میں شامل ہیں۔ کیس کا عنوان ’لکھیم پور کھیری میں تشدد کی وجہ سے جانی نقصان‘ ہے۔