دہلی، یوپی اور بہار میں سی بی آئی نے کتنے معاملات کی جانچ کی کتنے لیڈران کو گرفتار کیا گیا؟: ممتا بنرجی

 ایجنسیوں کے غلط استعمال پر مرکز پر نشانہ

کولکاتہ، 11 اپریل:(اردودنیا.اِن/ایجنسیاں)مغربی بنگال کی وزیر اعلیٰ اور ٹی ایم سی کی سربراہ ممتا بنرجی نے آج ایک بار پھر مرکزی حکومت کو تحقیقاتی ایجنسیوں کے مبینہ غلط استعمال پر نشانہ بنایا۔ کولکاتہ میں ایک پروگرام میں ممتا نے کہا کہ لوگوں کے قتل کے سلسلے میں دہلی، یوپی، راجستھان، آسام اور بہار میں سی بی آئی نے کتنی تحقیقات کی ہیں؟ کتنے لیڈران گرفتار ہوئے؟

سی بی آئی، ای ڈی کا استعمال کرکے آپ کتنی ہی سازشیں کر لیں، ہمیں کمزور مت سمجھیں۔ساتھ ہی مغربی بنگال کی وزیر اعلیٰ ممتا بنرجی نے کہا کہ سی بی آئی نادیہ کے عصمت دری اور قتل کیس کی تحقیقات کرے گی۔

نادیہ کے نابالغ عصمت دری اور قتل کیس پر ممتا نے کہا کہ آپ کو کیسے پتہ چلے گا کہ اس کی عصمت دری ہوئی تھی یا وہ حاملہ تھی یا اس کا عشق تھا یا وہ بیمار تھی؟ یہاں تک کہ گھر والوں کو بھی معلوم تھا کہ یہ محبت کا معاملہ ہے۔ اگر کوئی جوڑا رشتہ میں ہے تو میں انہیں کیسے روک سکتا ہوں؟ یہ یوپی نہیں ہے کہ میں لو جہاد کے نام پر کچھ بھی کروں۔