سڈنی:(اردودنیا.اِن/ایجنسیاں)عمر بڑھنے کے ساتھ ہمارا جسمانی میٹا بولزم (جسم میں ہونے والے کیمیائی تعاملات کا مجموعہ) سست پڑنے لگتا ہے۔میٹا بولزم سست پڑنے سے توانائی کا استعمال بھی سست پڑجاتا ہے اور دیکھتے ہی دیکھتے چربی جمع ہونے لگتی ہے، جس سے نجات پانا بہت مشکل ہوجاتا ہے۔ایسی صورت میں ہمیں اپنے #کھانے پینے کی عادات میں کچھ تبدیلی کی ضرورت ہوتی ہے۔
آسٹریلوی ماہر غذائیات اسٹیفن لوئی نے اس سلسلے میں ایک انتہائی مفید مشورہ دیا ہے جس پر عمل کرکے کسی بھی عمر میں باآسانی وزن کم کرنا ممکن ہے۔بین الا قوامی ذرائع ابلاغ کے مطابق سٹیفن لوئی کہتے ہیں کہ اگر آپ دو کھانوں کے درمیان کم از کم وقفہ پانچ گھنٹے رکھیں تو قدرتی طور پر آپ کا جسم فاضل چربی کو پگھلانا شروع کردیتا ہے۔
دوکھانوں کے درمیان اس سے کم وقفہ ہونے کی صورت میں اضافی چربی جسم میں جمع ہوتی رہتی ہے۔اگر آپ کھانوں کے درمیان پھل، چاکلیٹ، #بسکٹ اور نمکو وغیرہ جیسی ہلکی پھلکی چیزیں کھاتے ہیں تو آپ کا #جسم ان میں موجود #توانائی کو استعمال کرتا ہے اور جسم میں جمع ہونے والی #چربی کو نہیں پگھلاتا، لہٰذا وزن کم کرنے کےلئے دو کھانوں کے درمیان کم از کم پانچ گھنٹے کے لئے کچھ بھی نہیں کھانا چاہئیے۔
مزید اچھے نتائج کے لئے اس بات کو یقینی بنائیں کہ آپ صبح کے وقت ورزش کریں اور یہ ورزش ناشتے سے پہلے کریں۔اس سے نہ صرف آپ کا میٹابولزم تیز ہوگا بلکہ آپ صبح اٹھتے ہی ہشاش بشاش بھی ہوجائیں گے۔ آپ مشکل ورزشیں نہ کرنا چاہیں تو صرف آدھے گھنٹے کی واک کرکے ہی اپنا میٹابولزم تیز کرسکتے ہیں۔
