بجلی چوری معاملہ میں 18 سال کی سزا کاٹ رہے اکرام کو سپریم کورٹ نے رہا کردیا

نئی دہلی،16دسمبر:(اردودنیا.اِن/ایجنسیاں) یوپی میں بجلی چوری کے 9 مقدمات میں دو دو سال یعنی کل 18 سال کی سزا بھگت رہے ایک شخص کو سپریم کورٹ نے رہا کر دیا ہے۔ عدالت عظمی نے شخصی آزادی اور بنیادی حقوق کے تحفظ کو رہائی کی بنیاد قرار دیا اور کہا کہ اگر ہم ذاتی آزادی کے معاملات میں مداخلت نہیں کریں گے، تو یہ انصاف کی تنزلی ہوگی۔ چیف جسٹس ڈی وائی چندر چوڑ نے کہا کہ اگرچہ کوئی بھی معاملہ چھوٹا یا بڑا نہیں ہوتا ،لیکن اگر ہم شخصی آزادی سے جڑے اس طرح کے معاملات میں کچھ نہیں کرتے ،تو پھر ہمارے یہاں بیٹھنے کا کیا فائدہ! ہم یہاں ایسے لوگوں کی سسکیاں سننے ہی تو آئے ہیں اور اس لیے ہم راتوں کو جاگتے ہیں۔دراصل اکرام نامی شخص کو 2019 میں گرفتار کیا گیا تھا۔

اس پر بجلی چوری کے 9 مقدمات تھے اور 9 الگ الگ مقدمات چلائے گئے۔ ٹرائل کورٹ نے 2-2 سال کی سزا سنائی اور کہا کہ یہ سزائیں یکے بعد دیگرے چلیں گی۔ اس طرح اسے 18 سال کی سزا سنائی گئی۔ ہائی کورٹ نے ان کی اپیل مسترد کر دی کہ سزائیں ایک ساتھ نہیں چلنی چاہیے۔ اب سپریم کورٹ نے ہائی کورٹ کے فیصلے کو کالعدم قرار دے دیا ہے۔سماعت کے دوران سی جے آئی چندر چوڑ نے یوپی حکومت سے کہا کہ کیا آپ اس شخص کو بجلی چوری کے الزام میں 18 سال تک جیل میں رکھنا چاہتے ہیں؟ بجلی چوری کا مقدمہ قتل کے برابر نہیں ہوتا۔

سرمائی تعطیلات میں سپریم کورٹ کی کوئی بنچ نہیں ہوگی: سپریم کورٹ

نئی دہلی ،16دسمبر :(اردودنیا.اِن/ایجنسیاں)اس بار سپریم کورٹ میں موسم سرما کی تعطیلات کے دوران فوری معاملات کی سماعت کے لیے کوئی بینچ موجود نہیں ہوگی۔ جسٹس چندر چوڑ نے جمعہ کو یہ اعلان کیا۔ سپریم کورٹ میں 17 دسمبر2022 سے یکم جنوری2023 تک تعطیل رہے گی۔سی جے آئی چندر چوڑ کے اس اعلان کو اہم مانا جا رہا ہے کیونکہ مرکزی وزیر قانون کرن رجیجو نے جمعرات کو ہی راجیہ سبھا میں کہا تھا کہ لوگوں کا ماننا ہے کہ عدالتوں کی لمبی چھٹیاں انصاف کے متلاشیوں کے مفاد میں نہیں ہیں۔ آج سماعت شروع ہونے سے پہلے سی جے آئی چندرچوڑ نے اپنے کمرہ عدالت میں موجود وکلاء کو مطلع کیا کہ کل سے یکم جنوری تک کوئی بنچ دستیاب نہیں ہوگا۔

آج یعنی جمعہ کو دو ہفتے کی سردیوں کی چھٹی سے پہلے سپریم کورٹ کا آخری کام کا دن ہے۔سپریم کورٹ 2 جنوری2022 کو دوبارہ کھلے گی۔ کالجیم فائلوں پر تنازعہ کے درمیان، ملک کی عدالتوں میں چھٹیوں کا مسئلہ پہلے ہی کھڑا ہوگیا تھا۔ مرکز کے ساتھ کالجیم کی تقرری کے لیے زیر التوا فائلوں کو لے کر مرکز اور سپریم کورٹ کے درمیان تازہ کشمکش کے درمیان یہ معاملہ ایک نئے سرے کے ساتھ آیا ہے۔ اس سے قبل تعطیلات کے دنوں میں بھی سپریم کورٹ سے لے کر ڈسٹرکٹ کورٹ تک ہنگامی مقدمات کی سماعت کے لیے ایک یا دو چھٹی والے بنچ موجود ہوتے تھے۔ ماضی میں عدالتی تعطیلات پر بحث کے دوران سابق چیف جسٹس این وی رمنا نے کہا تھا کہ یہ غلط فہمی ہے کہ جج بہت آرام کرتے ہیں اور وہ اپنی چھٹیوں کا لطف اٹھاتے ہیں۔ جسٹس رمنا نے کہا تھا کہ فیصلوں کے اثرات کو دیکھتے ہوئے انصاف کرنے کی ذمہ داری بہت زیادہ ہے۔ہم چھٹیوں کے دوران بھی فیصلوں کی تحقیق کرتے ہیں۔