کانگریس کا بجرنگ دل پر پابندی کا اعلان جواب میں بھاجپا ہر گاؤں-ہر مندر میں کرے گی ہنومان چالیسا کا ’پاٹھ‘

بنگلورو ، 3 مئی:(اردودنیانیوز.کام/ایجنسیز) کرناٹک اسمبلی انتخابات میں کانگریس نے اعلان کیا ہے کہ اقتدار میں آنے کے بعد انتہا پسند تنظیم بجرنگ دل کو کالعدم قرار دیا جائے گا۔ دریں اثنا بی جے پی نے اعلان کیا ہے کہ ہر گاؤں اور ہر مندر میں ہنومان چالیسہ کا پاٹھ کیا جائے گا۔ وہیں، وزیر اعظم مودی نے آج (3 مئی) جنوبی کرناٹک کے مودبیدری میں ایک ریلی سے خطاب کرتے ہوئے ’’بجرنگ بلی کی جے‘‘ کے نعرے لگائے۔بی جے پی نے بجرنگ دل کو کالعدم قرار دینے کے اعلان کے بعد 10 مئی کو ہونے والی ووٹنگ سے پہلے انتخابی موضوع بنانے کی تیاری کر لی ہے۔گزشتہ شام بی جے پی نے ہنومان چالیسہ کے پاٹھ کا اعلان کر دیا۔ دریں اثنا، وزیر اعظم مودی نے کہا کہ مخالف جماعت کے منشور میں بجرنگ دل پر پابندی عائد کرنے کا وعدہ بھگوان ہنومان کو تالے میں بند کرنے کی کوشش ہے۔خیال رہے کہ کانگریس نے اپنے منشور میں بی جے پی حکومت کے اقتدار میں آنے کے ایک سال کے اندر تمام غیر منصفانہ قوانین اور عوام مخالف قوانین کو منسوخ کرنے کا وعدہ کیا تھا اور بجرنگ دل اور پی ایف آئی سمیت نفرت پھیلانے والے افراد اور تنظیموں کے خلاف سخت کارروائی کا وعدہ کیا تھا۔

کانگریس کرناٹک کو شاہی خاندان کیلئے’اے ٹی ایم نمبر ون‘ بنانا چاہتی ہے: مودی

پی ایم مودی نے بدھ کو اپنی انتخابی تقریر ’بجرنگ بلی کی جے‘ سے شروع کی اور کانگریس لیڈر سونیا گاندھی اور ان کے خاندان پر سخت حملہ کرتے ہوئے کہا کہ کانگریس کرناٹک میں اقتدار میں آنے کی کوشش کر رہی ہے کیونکہ ایسا اس لیے کر رہی ہے کہ وہ اسے دہلی میں بیٹھے شاہی خاندان کے لیے اے ٹی ایم نمبر ون بنا سکے ۔مسٹر مودی کرناٹک میں ایک انتخابی ریلی سے خطاب کر رہے تھے ۔انہوں نے کہا کہ ہماری کوشش ہے کہ کرناٹک صنعتی ترقی میں نمبر ون بنے، ہماری کوشش ہے کہ کرناٹک زراعت کی ترقی، تعلیم اور صحت میں نمبر ون بنے، لیکن کانگریس کیا چاہتی ہے، کانگریس کرناٹک کو شاہی خاندا ن دہلی میں بیٹھی سونیا گاندھی اور ان کی فیملی) کے لئے اے ٹی ایم نمبر ایک بنانا چاہتی ہے۔انہوں نے کہا کہ اس کے برعکس بھارتیہ جنتا پارٹی کا عزم کرناٹک کے جدید انفراسٹرکچر کو مضبوط کرنا اور کرناٹک کو ملک میں نمبر ون اور مینوفیکچرنگ سپر پاور بنانا ہے۔

کانگریس کے سینئر لیڈر اور سابق چیف منسٹر سدارامیا کو بالواسطہ نشانہ بناتے ہوئے انہوں نے کہا کہ دوسری طرف کانگریس بی جے پی کے ترقیاتی اقدامات کو ناکام بنانے کے لئے ریٹائرمنٹ کے نام پر ووٹ مانگ رہی ہے۔ انہوں نے دعویٰ کیا کہ یہ ان کا آخری الیکشن ہوگا۔کانگریس کے سابق صدر راہل گاندھی کے لندن میں ہندوستان کے خلاف ریمارکس پر تنقید کرتے ہوئے مسٹر مودی نے کہا کہ پوری دنیا ہندوستان میں ترقی اور جمہوریت کی تعریف کررہی ہے، لیکن کانگریس پوری دنیا میں ملک کو بدنام کررہی ہے۔

انہوں نے کہا کہ پوری دنیا کا اعتماد اور تعریف مودی کی وجہ سے نہیں ہے، بلکہ آپ کے ووٹ کی وجہ سے ہے، جس نے دہلی میں ایک مضبوط اور مستحکم حکومت کا آغاز کیا۔پی ایم مودی نے الزام لگایا کہ اگر سماج میں امن ہو تو کانگریس امن سے نہیں بیٹھ سکتی۔ اگر ملک میں ترقی ہوتی ہے تو کانگریس اسے برداشت نہیں کر سکتی، کانگریس کی ساری سیاست تقسیم کرو اور حکومت کرو کی پالیسی پر مبنی ہے۔