مہنگائی کے دور میں آمدن اٹھنی بھی نہیں ،مگر خرچہ روپیہ، مایاوتی کا طنز

لکھنؤ، 6دسمبر:(اردودنیانیوز.کام/ایجنسیز) بی ایس پی کی سربراہ سپریمو مایاوتی نے بدھ کو بابا صاحب ڈاکٹر بھیم راؤ امبیڈکر کو ان کی برسی کے موقع پر خراج عقیدت پیش کیا۔ اس موقع پر انہوں نے مرکزی حکومت کی ’پردھان منتری غریب کلیان ان یوجنا‘ پر نکتہ چینی کی۔امبیڈکر کو ان کے 67ویں’پرینیروان دیوس‘ پر خراج عقیدت پیش کرتے ہوئے، بی ایس پی سپریمو مایاوتی نے سوشل میڈیا پلیٹ فارم ایکس پر لکھا ک تقریباً 140 کروڑ کی وسیع آبادی والے ہندوستان کے غریبوں، مزدوروں، دلتوں، آدیواسیوں، انتہائی پسماندگان سمیت نظرانداز کئے گئے ’بہوجنوں‘ کے مسیحا اور ملک کے انسان دوست اور مساوات پسند آئین کے مرتب بھارت رتن بابا صاحب ڈاکٹر بھیم راؤ امبیڈکر کو ان کے پرینروان دیوس پر زبردست خراج عقیدت۔انہوں نے مزید لکھا کہ ملک کے 81 کروڑ سے زیادہ غریبوں کو کھانا کھلانے کے لیے سرکاری خوراک پر انحصار کرنے کی حالت نہ تو آزادی کا خواب تھا اور نہ ہی ان کے لیے فلاحی آئین بناتے وقت بابا صاحب ڈاکٹر بھیم راؤ امبیڈکر نے یہ سوچا تھا یہ صورت حال انتہائی افسوس ناک ہے۔

سابق وزیر اعلیٰ نے لکھا کہ ملک میں روزی روٹی کی کمی اور مہنگائی کے حملے کی وجہ سے آمدنی اٹھنی بھی نہیں ہے لیکن خرچہ روپیہ ہونے کے سبب غریبوں، مزدوروں، چھوٹے تاجروں، کسانوں، متوسط اور تمام محنت کشوں کی حالت پریشان کن اور تشویشناک ہے۔قابل ذکر ہے کہ غریب کلیان انا یوجنا کو یکم جنوری 2024 سے اگلے پانچ سالوں کے لیے بڑھایا جائے گا۔ انتیودیا خاندانوں کو ہر ماہ 35 کلو گرام اناج تقسیم کیا جائے گا۔ اس اسکیم سے 81 کروڑ سے زیادہ لوگ مستفید ہوں گے۔ اس اسکیم پر اگلے پانچ سالوں میں 11 لاکھ کروڑ روپے سے زیادہ خرچ کیے جائیں گے۔ یہ اسکیم کوویڈ 19 وبائی مرض کے دوران شروع کی گئی تھی۔