نتیش یا راہل کے بجائے ملکاارجن ہو سکتے ہیں انڈیا اتحاد کا پی ایم چہرہ: سونیا گاندھی

نئی دہلی،30نومبر:(اردودنیانیوز.کام/ایجنسیز) لوک سبھا انتخابات 2024 سے پہلے انڈیااتحاد میں وزارت عظمیٰ کے امیدوار کے لیے تنازعات اور پیچیدگیوں کا سلسلہ جاری ہے۔اتحادیوں کے درمیان واضح طور پر اپنے لیڈروں کو وزیر اعظم کا امیدوار بنانے کا مقابلہ ہے۔ کافی دنوں سے سیاسی حلقوں میں یہ بات چل رہی تھی کہ انڈیا الائنس لوک سبھا الیکشن 2024 نتیش کمار یا راہل گاندھی کی قیادت میں لڑ سکتا ہے۔ بہار کے وزیر اعلیٰ نتیش کمار کا نام وزیر اعظم کے عہدے کے امیدوار کے طور پر سامنے آ رہا ہے۔ تاہم اس بات میں کافی شک ہے کہ باقی ہندوستان نتیش کمار کو وزیر اعظم کے چہرے کے طور پر قبول کرنے پر راضی ہو جائے گا۔ وہیں کانگریس کی سابق صدر سونیا گاندھی نے اشارہ دیا ہے کہ انڈیا الائنس کے وزیر اعظم کے امیدوار کانگریس صدر ملکارجن کھرگے ہو سکتے ہیں۔

سونیا گاندھی سمیت اپوزیشن کے سرکردہ لیڈروں نے 2024 کے لوک سبھا انتخابات میں ملکارجن کھرگے کو بڑا رول دینے کا اشارہ دیا ہے۔ سونیا گاندھی نے 2024 کے لوک سبھا انتخابات میں پارٹی کی قیادت کرنے کے لیے ملکارجن کھرگے کی باضابطہ طور پر تائید کی ہے۔ سونیا گاندھی نے امید ظاہر کی ہے کہ پارٹی قائدین اس سے اتفاق کریں گے۔ کچھ دن پہلے سونیا گاندھی نے کہا تھا کہ کھرگے اس تاریخی لڑائی میں کانگریس پارٹی کی قیادت کرنے کے لیے بہترین ہیں۔ کھرگے نے ہمیشہ پارٹی تنظیم کو اپنے ذاتی مفاد سے بالاتر رکھا ہے۔ آج انہوں نے کانگریس پارٹی کو ایک اہم موڑ پر کھڑا کر دیا ہے۔ ایک مضبوط تنظیمی رہنما کے طور پر ملکارجن کھرگے قیادت کے لیے بہترین موزوں ہیں۔