ہندوستانی جی ڈی پی کی شرح نمو میں زبردست اُچھال

نئی دہلی،31اگست :(اردودنیانیوز.کام/ایجنسیز) ہندوستانی معیشت نے رواں مالی سال کی شاندار شروعات کی ہے۔ سرکاری اعداد و شمار کے مطابق ہندوستان کی معیشت نے پہلی سہ ماہی کے دوران 7.8 فیصد کی شرح نمو درج کی ہے۔ یہ دنیا کی کسی بھی بڑی معیشت کے مقابلے میں تیز ترین شرح نمو ہے۔ قومی شماریاتی دفتر (این ایس او) نے جمعرات کی شام پہلی سہ ماہی کے جی ڈی پی کے اعداد و شمار جاری کیے۔ پہلی سہ ماہی کے دوران حکومتی اخراجات، صارفین کی مضبوط مانگ اور خدمات کے شعبے کی اعلی سرگرمی جیسے عوامل نے ہندوستانی معیشت کو مدد فراہم کی۔اس سے قبل کور سیکٹر کے اعداد و شمار جاری کیے گئے تھے جس کے مطابق جولائی میں کور سیکٹر کی شرح نمو 8 فیصد پر آگئی جو ایک ماہ قبل جون میں 8.3 فیصد تھی۔ این ایس او کے اعداد و شمار کے مطابق گزشتہ سال اسی سہ ماہی میں یعنی جون 2022 کی سہ ماہی میں ہندوستان کی جی ڈی پی کی شرح نمو 13.1 فیصد تھی۔اس کے مقابلے اس سال ترقی کی شرح متاثر ہوئی ہے۔

پہلی سہ ماہی کے دوران زرعی شعبے کی شرح نمو 3.5 فیصد رہی، جبکہ تعمیراتی شعبے کی شرح نمو 7.9 فیصد رہی۔ مینوفیکچرنگ سیکٹر نے رواں مالی سال کی پہلی سہ ماہی میں مایوسی کا اظہار کیا جس کی شرح نمو 4.7 فیصد پر آگئی۔ بہت سے تجزیہ کار توقع کر رہے تھے کہ جون کی سہ ماہی میں ہندوستانی معیشت کی کارکردگی اچھی رہے گی۔ریزرو بینک آف انڈیا نے پہلی سہ ماہی میں جی ڈی پی کی شرح نمو 8 فیصد رہنے کا اندازہ لگایا تھا۔ اس کا مطلب ہے کہ پہلی سہ ماہی میں ترقی کی شرح ریزرو بینک کے تخمینہ سے تھوڑی کم رہی ہے۔ ریزرو بینک کے مطابق ملک کی اقتصادی ترقی کی شرح رواں مالی سال کی چار سہ ماہیوں میں بالترتیب 8 فیصد، 6.5 فیصد، 6 فیصد اور 5.7 فیصد رہ سکتی ہے۔ اس طرح آر بی آئی نے پورے موجودہ مالی سال کے لیے 6.5 فیصد کی شرح نمو کا اندازہ لگایا ہے۔

کئی ایجنسیوں نے حال ہی میں ہندوستان کی شرح نمو کے تخمینوں پر نظر ثانی کی ہے۔ بین الاقوامی مالیاتی فنڈ نے پہلے 2023 کے لیے شرح نمو 5.9 فیصد رہنے کا تخمینہ لگایا تھا جسے بعد میں اس نے 6.1 فیصد کر دیا۔ آئی ایم ایف نے 2024 میں شرح نمو 6.3 فیصد رہنے کی پیش گوئی کی ہے۔ اس سے پہلے، مارچ 2023 کی سہ ماہی میں، ہندوستانی معیشت نے 6.1 فیصد کی شرح نمو درج کی تھی، جب کہ پورے مالی سال 2022-23 کے دوران ملک کی اقتصادی ترقی کی شرح 7.2 فیصد تھی۔گزشتہ مالی سال کے دوران ہندوستانی معیشت نے توقع سے بہتر کارکردگی کا مظاہرہ کیا۔

ریزرو بینک نے پچھلے مالی سال کے دوران ترقی کی شرح 7 فیصد رہنے کا اندازہ لگایا تھا۔ اگرچہ ترقی کی شرح ایک سال پہلے سے کم تھی، کیونکہ مالی سال 2021-22 میں ہندوستان کی اقتصادی ترقی کی شرح 9.1 فیصد تھی۔ اس اچھی کارکردگی کے ساتھ، ہندوستان عالمی ترقی کا انجن بنا ہوا ہے اور سب سے تیزی سے ترقی کرنے والی بڑی معیشت بنا ہوا ہے۔ دیگر بڑی معیشتوں کی کارکردگی پر نظر ڈالیں تو دنیا کی سب سے بڑی معیشت امریکہ نے جون کی سہ ماہی کے دوران 2.1 فیصد کی شرح سے ترقی کی۔ یہ شرح سہ ماہی کی بنیاد پر ہے۔ اسی وقت، دوسری سب سے بڑی معیشت چین نے جون کی سہ ماہی کے دوران ایک سال پہلے کے مقابلے میں 6.3 فیصد کی شرح نمو درج کی۔