نئی دہلی ،15ستمبر:(اردودنیا.اِن/ایجنسیاں) ہندوستان سری لنکا کو 2022 میں سب سے بڑا قرض دہندہ کے طور پر ابھرا ہے۔ سری لنکا کو سیاسی اور اقتصادی بحران کا سامنا ہے۔ سال رواں میں ہندوستان نے اپنے پڑوسی ملک کو 377 ملین ڈالر کا قرض دیا ہے۔ یہ دعویٰ تحقیقی ادارے ویریٹ ریسرچ(Verite Research) کی ایک رپورٹ میں کیا گیا ہے۔رپورٹ کے مطابق ایشیائی ترقیاتی بینک (ADB) اس عرصے میں 360 ملین ڈالر کا قرض لے کر سری لنکا کو دوسرا بڑا قرض دینے والا بن گیا ہے۔ہندوستان اور اے ڈی بی دونوں نے مل کر اس سال جنوری اور اپریل کے درمیان سری لنکا کو مختص کردہ کل قرض کا 76 فیصد حصہ دیا۔
سال کے پہلے چار مہینوں میں سری لنکا کو مختلف حکومتوں اور اداروں کی جانب سے مجموعی طور پر 968 ملین ڈالر کے قرضے مختص کیے گئے۔ اس میں ہندوستان 377 ملین ڈالر کے ساتھ سب سے آگے ہے۔سری لنکا میں قائم آزاد تحقیقی ادارے ویریٹ ریسرچ نے کہا ہے کہ اے ڈی بی سری لنکا کو قرض دینے والا سب سے بڑا کثیر الجہتی ادارہ رہا ہے۔ ایشیائی خطے میں نجی کمپنیوں اور حکومتوں کو اسٹریٹجک تجزیہ کی مشاورت بھی فراہم کرتا ہے۔کولمبو میں ہندوستانی ہائی کمیشن نے کہا کہ اس سال سری لنکا کو ہندوستان سے 4 بلین ڈالر کا کل لائن آف کریڈٹ دیا گیا ہے جس میں کرنسیوں کا تبادلہ بھی شامل ہے۔
سری لنکا اس سال کے آغاز سے ہی گہرے مالیاتی بحران سے دوچار ہے۔ زرمبادلہ کی کمی کی وجہ سے وہ اشیائے خوردونوش اور ایندھن کی ضروری اشیا تک خریدنے کے قابل نہیں تھا۔ ایسے وقت میں ہندوستان نے انہیں ایندھن کی خریداری کے لیے قرض کی سہولت بھی فراہم کی۔ضروری اشیا کی قیمتوں میں اضافے سے سری لنکا میں اندرونی بے چینی بھی پھیل گئی۔ وسیع پیمانے پر پرتشدد مظاہروں کے بعد اس وقت کے صدر گوتابایا راجاپاکسے کو ملک چھوڑنے پر مجبور ہونا پڑا۔تاہم، رانیل وکرما سنگھے کی قیادت میں موجودہ حکومت بین الاقوامی مالیاتی فنڈ (آئی ایم ایف) کے ساتھ 2.9 بلین ڈالر کے قرض کے معاہدے پر دستخط کرنے میں کامیاب رہی ہے۔ تجزیہ کاروں کو توقع ہے کہ صورتحال کسی حد تک بہتر ہونے کی امید ہے۔
