"پاپا، میں مزید درد برداشت نہیں کر سکتا”: کینیڈا میں ہندوستانی نژاد شخص کی اسپتال میں 8 گھنٹے انتظار کے بعد موت
کینیڈا کے اسپتال میں علاج میں تاخیر کے باعث ہندوستانی نژاد شخص کا انتقال
ایڈمنٹن، کینیڈا:(اردودنیا.اِن/ایجنسیز) کینیڈا کے شہر ایڈمنٹن میں صحت کی دیکھ بھال کے نظام پر سنگین سوالات کھڑے ہو گئے ہیں، جہاں ایک 44 سالہ ہندوستانی نژاد شخص پرشانت سری کمار مبینہ دل کے دورے کے بعد بروقت علاج نہ ملنے کے سبب جان کی بازی ہار گیا۔ افسوسناک بات یہ ہے کہ شدید سینے کے درد کے باوجود اسے تقریباً آٹھ گھنٹے ایمرجنسی میں انتظار کرنا پڑا۔
میڈیا رپورٹس کے مطابق یہ واقعہ Grey Nuns Community Hospital میں پیش آیا۔ Global News کی رپورٹ میں بتایا گیا کہ پرشانت، جو ایک اکاؤنٹنٹ اور تین بچوں کے والد تھے، کام کے دوران اچانک شدید سینے کے درد میں مبتلا ہوئے۔ ایک مؤکل انہیں فوری طور پر اسپتال لے گیا، جہاں ایمرجنسی روم میں انہیں انتظار کرنے کو کہا گیا۔
خاندان کے مطابق پرشانت کا بلڈ پریشر خطرناک حد تک بڑھ کر 210 تک پہنچ گیا، اس کے باوجود انہیں محض درد کم کرنے کی دوا (ٹائلینول) دی گئی۔ ایک ویڈیو میں پرشانت کی اہلیہ نے دعویٰ کیا کہ گھنٹوں کی اذیت کے دوران بارہا مدد کی فریاد کی گئی، مگر مؤثر طبی توجہ نہ ملی۔
پرشانت کے والد کمار سری کمار نے بتایا کہ ان کا بیٹا مسلسل درد کی شدت سے آگاہ کرتا رہا۔انہوں نے کہا، “اس نے مجھے کہا، ‘پاپا، میں مزید درد برداشت نہیں کر سکتا’، مگر کوئی ڈاکٹر وقت پر نہیں آیا۔”
خاندان کا کہنا ہے کہ پرشانت کا صرف ای سی جی کیا گیا، جس میں فوری طور پر کوئی تشویشناک نتیجہ سامنے نہیں آیا، اور انہیں مزید علاج کے انتظار میں چھوڑ دیا گیا۔ نرسنگ اسٹاف نے بلڈ پریشر چیک کیا جو مسلسل بڑھتا جا رہا تھا۔ آٹھ گھنٹے بعد جب انہیں علاج کے لیے بلایا گیا تو پہنچتے ہی ان کی حالت بگڑ گئی اور وہ چند سیکنڈ میں زمین پر گر پڑے۔ بعد ازاں ان کے انتقال کی تصدیق کر دی گئی۔
پرشانت کے پسماندگان میں اہلیہ اور تین کم سن بچے شامل ہیں، جن کی عمریں 3، 10 اور 14 سال ہیں- خاندان اور قریبی دوست شدید صدمے میں ہیں اور جاننا چاہتے ہیں کہ شدید سینے کے درد کے مریض کو ڈاکٹر دیکھے بغیر اتنا طویل انتظار کیوں کرنا پڑا۔
خاندانی دوست وریندر بھلر نے واقعے کو نہایت افسوسناک قرار دیتے ہوئے کہا کہ“یہ نقصان ناقابلِ تلافی ہے۔ ہم اسپتال اور صحت کے نظام سے اس سے کہیں بہتر کی توقع رکھتے تھے۔”
یہ واقعہ ایک بار پھر کینیڈا کے ایمرجنسی ہیلتھ کیئر سسٹم میں تاخیر، وسائل کی کمی اور ترجیحی علاج کے معیار پر بحث چھیڑ رہا ہے، خاص طور پر ایسے مریضوں کے لیے جو دل کے دورے جیسی جان لیوا علامات کے ساتھ اسپتال پہنچتے ہیں۔
A 44-year-old Edmonton man has died, leaving behind his wife and three children, after reportedly waiting more than eight hours at the Grey Nuns Hospital while experiencing persistent chest pain.
While waiting, he allegedly reported blurred vision and had a blood pressure… pic.twitter.com/7vpZL9wjyy
— YEGWAVE (@yegwave) December 24, 2025
