ریلوے کی وضاحت: موبائل پر ای ٹکٹ دکھانا کافی، پرنٹ آؤٹ لازمی نہیں

نئی دہلی:(اردودنیا.اِن/ایجنسیز) ہندوستانی ریلوے نے جنرل کلاس میں سفر کرنے والے مسافروں کے لیے ایک اہم وضاحت جاری کرتے ہوئے ان خبروں کی واضح تردید کر دی ہے جن میں دعویٰ کیا جا رہا تھا کہ اب ڈیجیٹل ٹکٹ قابلِ قبول نہیں ہوں گے اور سفر کے دوران ٹکٹ کا پرنٹ آؤٹ رکھنا لازمی ہوگا۔ ریلوے حکام کے مطابق ایسی اطلاعات بے بنیاد ہیں اور اس حوالے سے کوئی نیا حکم یا ہدایت جاری نہیں کی گئی ہے۔

ریلوے نے واضح کیا ہے کہ جو مسافر آن لائن ویب سائٹ یا موبائل ایپ کے ذریعے ٹکٹ بک کرتے ہیں، وہ اپنے اسمارٹ فون پر موجود ڈیجیٹل ای ٹکٹ دکھا کر بغیر کسی پریشانی کے سفر کر سکتے ہیں۔ موبائل اسکرین پر دکھایا جانے والا ٹکٹ مکمل طور پر قانونی اور قابلِ قبول ہے، اس کے لیے کسی بھی قسم کے پرنٹ آؤٹ کی ضرورت نہیں ہوتی۔

حالیہ دنوں میں بعض میڈیا رپورٹس کے بعد مسافروں کے درمیان یہ الجھن پیدا ہو گئی تھی کہ آیا موبائل ٹکٹ اب غیر مؤثر ہو چکے ہیں، تاہم ریلوے حکام نے صاف الفاظ میں کہا ہے کہ پہلے سے رائج قوانین میں کوئی تبدیلی نہیں کی گئی اور ڈیجیٹل ٹکٹ کا نظام بدستور نافذ ہے۔

ریلوے قوانین کے مطابق، اگر کسی مسافر نے ٹکٹ ڈیجیٹل طور پر بک کیا ہے اور پرنٹ شدہ ٹکٹ حاصل نہیں کیا، تو وہ موبائل فون پر ٹکٹ دکھا کر سفر کر سکتا ہے۔ البتہ اگر ٹکٹ بکنگ کاؤنٹر سے خریدا گیا ہو یا آن لائن بکنگ کے بعد پرنٹ شدہ ٹکٹ کا انتخاب کیا گیا ہو، تو ایسی صورت میں سفر کے دوران ٹکٹ کی فزیکل کاپی ساتھ رکھنا ضروری ہوگا۔

اس معاملے پر پارلیمنٹ کے سرمائی اجلاس کے دوران لوک سبھا میں تحریری جواب دیتے ہوئے ریلوے کے وزیر اشونی وشنو نے بتایا کہ ہندوستانی ریلوے میں بک ہونے والے تقریباً ستاسی فیصد ریزرو ٹکٹ ای ٹکٹ کی شکل میں جاری کیے جاتے ہیں۔ ان کے مطابق یہ اعداد و شمار اس بات کا واضح ثبوت ہیں کہ ملک میں آن لائن اور ڈیجیٹل بکنگ کا نظام بڑے پیمانے پر اپنایا جا چکا ہے، اس لیے ڈیجیٹل ٹکٹوں کو غیر معتبر قرار دینے کا کوئی سوال ہی پیدا نہیں ہوتا۔