ہجری کلینڈر کے بجائے تمام سرکاری معاملات میں عیسوی کیلنڈر کا ہوگا اعتبار

ریاض، یکم نومبر:(اردودنیانیوز.کام/ایجنسیز) سعودی کابینہ کے اجلاس میں فیصلہ کیا گیا ہے کہ تمام سرکاری معاملات عیسوی کیلنڈر کے مطابق ہوں گے۔سعودی خبررساں ادارے ایس پی اے کے مطابق کابینہ کا اجلاس ریاض میں ولی عہد شہزادہ محمد بن سلمان کی زیر صدارت منعقد ہوا۔ اجلاس میں کہا گیا کہ اس سے اسلامی شریعت کے احکام سے تعلق رکھنے والے ایسے امور مستثنیٰ ہوں گے جن کا دارومدار ہجری تاریخ پر ہوتا ہے۔اس سے وہ معاملات بھی مستثنیٰ ہوں گے جن کے بارے میں یہ طے ہوچکا ہے کہ وہ ہجری تاریخ کی بنیاد پر انجام دیے جائیں گے۔کابینہ نے گزشتہ دنوں سعودی عرب کی میزبانی میں ہونے والے اہم اقتصادی پروگرام خصوصا فیوچر انوسٹمنٹ انشیٹو فورم کے حوالے سے رپورٹوں کا بھی جائزہ لیا۔ کابینہ نے مختلف ممالک کے ساتھ پوسٹل اور لاجسٹک خدمات کے شعبے میں تعاون کی مفاہمتی یادداشتوں کی منظوری دی۔