ممبئی،26ستمبر:(اردودنیا.اِن/ایجنسیاں)منی نیلامی آئی پی ایل 2023 سے پہلے منعقد کی جائے گی۔ اس سے قبل سال 2022 میں میگا نیلامی کا اہتمام کیا گیا تھا۔ دراصل آئی پی ایل ٹیمیں منی نیلامی سے پہلے ٹریڈنگ ونڈو میں کھلاڑیوں کو شامل اور ہٹا سکتی ہیں۔ تاہم اس کے لیے دونوں ٹیموں کے مالکان کا متفق ہونا ضروری ہے۔ اس کے ساتھ ہی اب سب کی نظریں آئی پی ایل 2023 سے پہلے منی نیلامی پر لگی ہوئی ہیں۔ خیال کیا جا رہا ہے کہ منی نیلامی 16 دسمبر کو منعقد کی جا سکتی ہے۔ آج ہم ایسے کھلاڑیوں کے بارے میں بات کریں گے،جو منی نیلامی میں مہنگے فروخت ہو سکتے ہیں۔آسٹریلیا کے آل راؤنڈر کیمرون گرین نے ہندوستان-آسٹریلیا T20 سیریز میں کافی متاثر کیا ہے۔
بھارت کے خلاف سیریز میں کیمرون گرین نے بیٹنگ میں اپنی صلاحیت دکھائی جب کہ بولنگ میں بھی متاثر کیا۔ تاہم اس کھلاڑی کی آل راؤنڈر صلاحیت کی وجہ سے آئی پی ایل منی نیلامی میں بھاری رقم مل سکتی ہے۔ تقریباً تمام ٹیمیں اس نوجوان باصلاحیت کھلاڑی کو اپنے ساتھ شامل کرنا چاہیں گی۔بین اسٹوکس انگلینڈ کی ٹیسٹ ٹیم کے کپتان ہیں۔ دراصل بین اسٹوکس آئی پی ایل میگا آکشن 2022 میں نہیں تھے، لیکن اب وہ آئی پی ایل 2023 کے لیے دستیاب ہیں۔
خیال کیا جا رہا ہے کہ بین اسٹوکس آئی پی ایل کی منی نیلامی میں موجود ہوں گے۔ اگر بین اسٹوکس آئی پی ایل کی منی نیلامی میں شامل ہوتے ہیں تو اس آل راؤنڈر کو بڑی رقم مل سکتی ہے۔غور طلب ہے کہ بین اسٹوکس آئی پی ایل میں رائزنگ پونے سپر جوائنٹس اور راجستھان رائلز کے لیے کھیل چکے ہیں۔سیم کرن کو موجودہ دور کے بہترین آل راؤنڈر کرکٹرز میں شمار کیا جاتا ہے۔ خاص طور پر اس کھلاڑی نے محدود اوورز کی کرکٹ میں بہت متاثر کیا ہے۔
سیم کرن آئی پی ایل میگا آکشن 2022 میں موجود نہیں تھے، لیکن وہ آئی پی ایل 2023 منی آکشن کا حصہ بن سکتے ہیں۔آئی پی ایل کی منی نیلامی میں تقریباً تمام ٹیمیں اس آل راؤنڈر پر بھاری رقم خرچ کرکے اسے اپنی ٹیم میں شامل کرنا چاہیں گی۔آسٹریلیا کے فاسٹ باؤلر مچل اسٹارک کو پاور پلے اوور اور ڈیتھ اوور میںخطرناک باؤلر سمجھا جاتا ہے۔ یہ گیند باز پاور پلے اوور میں سوئنگ اور ڈیتھ اوور میں یارکر کے لیے جانا جاتا ہے۔ دراصل، مچل اسٹارک اس سے قبل رائل چیلنجرس بنگلور اور کولکاتہ نائٹ رائیڈرز کے لیے آئی پی ایل میں کھیل چکے ہیں۔
آئی پی ایل کی منی نیلامی میں ٹیمیں بھاری رقم خرچ کر کے اس کھلاڑی کو اپنی ٹیم شامل کر سکتی ہیں۔انگلینڈ کے نوجوان بلے باز ہیری بروک نے پاکستان کیخلاف سیریز میں کافی متاثر کیا ہے۔ وہیں ان کے ٹی ٹوئنٹی کیریئر پر نظر ڈالیں تو اب تک 8 میچوں میں 253 رنز بنا چکے ہیں۔ اس دوران ہیری بروک کا اوسط 42.17 جبکہ اسٹرائیک ریٹ 156.17 رہا۔ اس کے علاوہ ہیری بروک اپنے ٹی ٹوئنٹی کیریئر میں اب تک 10 چھکے اور 25 چوکے لگا چکے ہیں۔ مانا جا رہا ہے کہ ہیری بروک کو بھی آئی پی ایل منی آکشن 2023 میں اچھی قیمت مل سکتی ہے۔
