اسرائیل کو یحییٰ السنوار کے بھائی محمد السنوار کی تلاش
حزب اللہ ایران کی مدد سے تعمیر نو کی کوشش کر رہی ہے
مقبوضہ بیت المقدس،14جنوری :(اردودنیا.اِن/ایجنسیز) حماس کو بلاشبہ گزشتہ موسم خزاں میں اس وقت شدید دھچکا لگا جب اسرائیل نے تحریک کے رہنما اور 7 اکتوبر کے حملے کے ماسٹر مائنڈ یحییٰ السنوار کو ہلاک کر دیا۔تاہم السنوار کے چھوٹے بھائی محمد نے اپنے بھائی کی جگہ تحریک اور جنگ دونوں کی کمان سنھبال لی۔ اسرائیلی ذرائع کے مطابق محمد السنوار نے مسلح تحریک کی تعمیر نو کے لیے کام شروع کر دیا ہے۔اس نے بھرتی مہم شروع کی جب لڑائی جاری تھی۔انہوں نے کہا کہ اگرچہ اسرائیلی فوج نے تحریک کو شدید نقصان پہنچایا ہے، لیکن اسے گزشتہ مہینوں کے دوران ان علاقوں میں واپس جانے پر مجبور کیا گیا ہے جہاں اس نے پہلے عسکریت پسندوں کا صفایا کردیا تھا۔
وال سٹریٹ جرنل کے مطابق اس تناظر میں اسرائیلی فوج کے ایک ریٹائرڈ بریگیڈیئر جنرل عامر عویوی نے کہا کہ حماس کی تعمیر نو کی رفتار اسرائیلی فوج کی جانب سے اس کے خاتمے کی رفتار سے زیادہ ہے۔انہوں نے مزید کہا کہ محمد سنوار سارے امور کا انتظام چلاتے ہیں۔جب کہ اسرائیل کے ساتھ جنگ بندی مذاکرات میں حصہ لینے والے ثالثوں نے انکشاف کیا کہ دوحہ میں تحریک کی سیاسی قیادت نے ایک نئی قیادت کونسل کے تقرر پر اتفاق کیا ہے مگر غزہ میں حماس کے جنگجوؤں نے اس کی پاسداری نہیں کی۔
انہوں نے مزید کہا کہ حماس کے جنگجو اب السنوار جونیر کی کمان میں آزادانہ طور پر کام کر رہے ہیں۔ انھوں نے نشاندہی کی کہ حماس کے نئے جنگجو تجربے کی کمی کے باوجود صرف چند جنگجوؤں پر مشتمل چھوٹے سیلوں کی شکل میں حملے کرتے ہیں، ہلکے ہتھیاروں اور ٹینک شکن ہتھیاروں کا استعمال کرتے ہیں جن کے لیے وسیع فوجی تربیت کی ضرورت نہیں ہوتی ہے۔انہوں نے وضاحت کی کہ حماس نوجوانوں اور ان کے خاندانوں کو مزید خوراک، امداد اور طبی دیکھ بھال فراہم کرنے کے وعدوں کے ذریعے نئے جنگجوؤں کو راغب اور بھرتی کرتی ہے۔
اقوامِ متحدہ میں اسرائیل کا الزام: حزب اللہ ایران کی مدد سے تعمیر نو کی کوشش کر رہی ہے
جینوا،14جنوری :(اردودنیا.اِن/ایجنسیز) اقوامِ متحدہ میں اسرائیل کے سفیر نے پیر کو سلامتی کونسل کو بتایا کہ اسرائیل اور علاقائی استحکام کے لیے عسکریت پسند بدستور سنگین خطرہ ہیں۔گذشتہ ماہ رائٹرز کی اطلاع کردہ تازہ ترین امریکی انٹیلی جنس نے خبردار کیا تھا کہ ایران کی حمایت یافتہ حزب اللہ ممکنہ طور پر اپنے اسلحے کے ذخائر اور افواج کو دوبارہ بنانے کی کوشش کرے گی جو امریکہ اور اس کے علاقائی اتحادیوں کے لیے ایک طویل مدتی خطرہ ہیں۔اسرائیل اور حزب اللہ کے درمیان 27 نومبر کو جنگ بندی معاہدہ ہوا جس کے حوالے سے فریقین نے ایک دوسرے پر خلاف ورزی کا الزام لگایا ہے۔
اقوامِ متحدہ میں اسرائیل کے سفیر ڈینی ڈینن نے 15 رکنی سلامتی کونسل کو خط میں لکھا، ”اگرچہ جنگ کے دوران حزب اللہ کی عسکری صلاحیتوں میں نمایاں کمی واقع ہوئی لیکن اب وہ ایران کی مدد سے دوبارہ طاقت حاصل کرنے اور مسلح ہونے کی کوشش کر رہے ہیں۔نیویارک میں اقوامِ متحدہ میں ایران کے مشن اور حزب اللہ نے ڈینن کے تبصرے پر بات کرنے کی درخواست کا فوری جواب نہیں دیا۔ حزب اللہ کے قریبی ایک سینئر لبنانی ذریعے نے ان الزامات کی تردید کی ہے۔
ڈینن نے کہاکہ یہ لازمی ہے کہ لبنانی حکومت اور بین الاقوامی برادری شام-لبنان سرحد پر اور فضائی اور سمندری راستوں کے ذریعے ہتھیاروں اور گولہ بارود کی سمگلنگ اور مالی امداد روکنے پر توجہ مرکوز کریں۔ڈینن نے رائٹرز کے ملاحظہ کردہ خط میں لکھا، جنگ بندی معاہدہ طے پانے کے بعد سے حزب اللہ کو ہتھیار اور نقدی منتقل کرنے کی کئی کوششیں کی گئی ہیں۔انہوں نے کہا کہ حزب اللہ کی موجودہ فوجی تعمیر بعض اوقات جنوبی لبنان میں اقوامِ متحدہ کے امن فوجی مراکز اور گشت کے مقامات کے قریب ہوتی تھی۔ڈینن نے لکھاکہ اس کے باوجود امن فوج نے اپنے اختیار کا نرمی سے استعمال کرنے اور اس بات کو یقینی بنانے کے لیے تمام ضروری کارروائی نہ کرنے کا فیصلہ کیا کہ اس کی کارروائی کا علاقہ کسی بھی دشمنانہ سرگرمیوں کے لیے استعمال نہ ہو۔
اسرائیل طویل عرصے سے اقوامِ متحدہ کے امن دستوں پر تنقید کرتا رہا ہے۔اقوامِ متحدہ کے اعلیٰ حکام نے بارہا اس بات پر زور دیا ہے کہ امن فوج کا صرف ایک معاون کا کردار ہے اور اسے فریقین کی جانب سے قرارداد 1701 پر عمل درآمد میں ناکامی کا ذمہ دار قرار نہیں دیا جا سکتا۔ڈینن نے کہاکہ ہمیں تشویش ہے کہ سبق نہیں سیکھا گیا اور آج ہم حزب اللہ کے بدلتے ہوئے طریقہ کار کا مقابلہ کرنے کے لیے فوج کی طرف سے ایک اور انکار کا مشاہدہ کر رہے ہیں اور اس کے ساتھ انہوں نے اپنے اختیار کو مکمل طور پر نافذ کرنے سے بھی انکار کیا ہے۔
اسرائیلی فوج کا یمن سے فائر کیا گیا ایک میزائل فضا میں تباہ کرنے کا دعویٰ
مقبوضہ بیت المقدس،14جنوری :(اردودنیا.اِن/ایجنسیز) اسرائیل اور حوثیوں کے درمیان کشیدگی اور باہمی خطرات کے درمیان اسرائیلی فوج نے یمن سے آنے والے ایک میزائل کو روکنے کا اعلان کیا ہے۔انہوں نے ایک بیان میں کہا کہ فضائیہ نے یمن سے داغے گئے ایک میزائل کو اسرائیل میں داخل ہونے سے پہلے ہی روک دیا۔قابل ذکر ہے کہ کئی مہینوں سے ایرانی حمایت یافتہ حوثی اس بات پر اصرار کر رہے ہیں کہ وہ اسرائیل کی دھمکیوں کے باوجود غزہ کی پٹی پر جنگ بند ہونے تک اسرائیل کا مقابلہ جاری رکھیں گے۔پچھلے ایک سال کے دوران انہوں نے اسرائیل کی طرف راکٹ اور بوبی ٹریپ ڈرون لانچ کیے ہیں لیکن ان سے اکثر کوئی خاص نقصان نہیں پہنچا سکے۔جواب میں اسرائیلی فضائیہ نے یمن میں متعدد مقامات پر یہ کہتے ہوئے بمباری کی کہ اس نے حوثیوں کے اسلحے کے گوداموں کو نشانہ بنایا ہے۔
18 دسمبر 2024 کو درجنوں اسرائیلی جنگی طیاروں نے دارالحکومت صنعا کے ساتھ ساتھ حدیدہ میں حوثیوں کے ٹھکانوں پر 16 حملے کیے۔ اس کے علاوہ خاص طور پر الصلیف اور راس عیسیٰ کی بندرگاہوں پر بھی اسرائیل نے بمباری کی۔
دریں اثنا اسرائیلی وزیر اعظم بنجمن نیتن یاہو نے حوثیوں کو مستقبل میں مزید حملوں کی دھمکی دی۔انہوں نے کہا کہ حوثی ایرانی محور کا واحد بازو بن گئے ہیں جس نے ابھی تک اسرائیلی طاقت کا تجربہ نہیں کیا ہے۔اسرائیلی وزیر دفاع یسرائیل کاٹز نے حوثیوں کو بھی ایسی ہی دھمکی جاری کرتے ہوئے کہا کہ انہیں ”جان لینا چاہیے کہ ہمارا لمبا ہاتھ ان تک پہنچ جائے گا۔قابل ذکر ہے کہ سات اکتوبر 2023 کو غزہ میں جنگ شروع ہونے کے بعد سے حوثیوں نے اسرائیل کی جانب درجنوں میزائل اور ڈرون حملے کیے ہیں اور غزہ کی حمایت میں بحیرہ احمر میں درجنوں کارگو جہازوں کو بھی نشانہ بنایا ہے۔ تاہم بعض مبصرین کا خیال ہے کہ لبنان میں حزب اللہ کے ساتھ ساتھ حماس کی نمایاں صلاحیتوں کو ختم کرنے کے بعد اسرائیل حوثیوں پر حملہ کرنے کے لیے زیادہ تیار اور پرعزم ہے۔
